Kommuneqarfik Sermersooq Nuussuarmi immikkoortukkuutaartumik atuarfiliorusuttoq
Nuup ilaani Nuussuarmi immikkoortukkuutaartumik atuarfiliortoqarnissaanik periarfissanik misissuisoqarpoq.
Sanaartornermut Avatangiisinullu Ingerlatsivik politikikkut kissaateqarneq tunngavigalugu Nuummi utaqqiisaasumik immikkoortukkuutaartumik atuarfimmik pilersitsinissamut periarfissamik misissuivoq.
Aningaasaqarnermut Inuussutissarsiornermullu ataatsimiititaliami oqaluuserisassanut tamanna ilaasoq, Kommuneqarfik Sermersuup nittartagaani takuneqarsinnaavoq.
Nuussuarmi arsaattarfiup eqqaani sanaartorneqarnissaa kissaatigineqarpoq.
Atuarfiup 2.000 kvadratmeteritut angitiginissaa illullu quleriinnik marlunnik initaqarnissaa pilersaarutigineqarpoq. Taamaalilluni klassinut 13-inut naammannissaa naatsorsuutigineqarpoq.
Sanaartorneqarnissaanullu aningaasat 50 millionit koruunit 65 millionit koruunillu akornanni akeqassasoq, kommunimit nalilerneqarpoq.
Tamannali kommunalbestyrelsimi qaqugu aalajangiiffigineqassanersoq oqaluuserineqassanersorluunniit, kommunalbestyrelsip ataatsimiinnermi oqaluuserisassani takussutissaqanngilaq.
Kommuneqarfik Sermersuumi kommunalbestyrelsimi ilaasortat ilaat tassunga tunngatillugu KNR-imit apersorniaraluarpagut. Taakkuli oqaaseqarsinnaanatik ilisimatitsipput.
