Kommuneqarfik Sermersooq noorarfigineqarpoq

Nunatsinni kommuneqarfinni sisamaasuni Kommuneqarfik Sermersuup kisiartaalluni inuttusiartorpoq, allat pingasut ukiumut kingullermut sanilliullugit inukilliartorput.
Allattoq Mads Pedersen
februaarip 29-at 2012 09:47

Naatsorsueqqissaartarfiup nittartakkamini saqqummiussaani nutaami ”2012-mi innuttaasut”-mi takuneqarsinnaavoq Kommuneqarfik Sermersuup innuttaasui 254-nik amerleriarsimasut. Tassa 21.813-niulerlutik.

Qeqqata Kommuniani innuttaasut 46-nik ikileriarsimapput, 9.638-iulerlutik. Kommune Kujalliup innuttaasui 24 ikilipput, 7.417-inngorlutik. Kiisalu Qaasuitsup Kommuneani innuttaasut 55-nik ikileriaateqarsimallutik, 17.687-inngorlutik.

Nunaqarfinniit illoqarfinnut nuuttartut suli amerliartorput, tamanna naatsorsueqqissaartaarfiup misissuinerata kingulliup takutippaa.

Nunaqarfiit innuttaasui ukiuni kingulliit arfinillit katillugit 1000-nik ikileriarsimapput. Tassa innuttaasut 9000-niit 8000-inut appariarsimammata.

2011-imiit 2012-imut 222-nik nunaqarfinni innuttaasut ikileriarput. Kommune Kujallermi 27-nik, Sermersuup Kommuneani 26-nik, Qaasuitsup Kommuneani 82-inik kiisalu Qeqqata Kommuneani 87-inik nunaqarfinni innuttaasut ikileriarsimapput.

Kommuneqarfinni illoqarfiit nunaqarfiillu inuttussusaat:

Kommuneqarfik Sermersooq:
Illoqarfinni: 20.217
Nunaqarfinni: 1.456

Qeqqata Kommunea:
Illoqarfinni: 8.286
Nunaqarfinni: 1.352

Qaasuitsup Kommunea:
Illoqarfinni: 13.447
Nunaqarfinni: 4.240

Kommune Kujalleq:
Illoqarfinni: 6.282
Nunaqarfinni: 969