Kommuneqarfik Sermersooq: Maleruaqqusat malippagut
- Kommuneqarfik Sermersuup tarnimikkut napparsimasut inissianut allerniittunut innersuussisarnera akisussaassuseqannginneruvoq, Ineqarnermut Naalakkersuisoq Siverth K. Heilmann oqarpoq.
Kommune taamaaliunngilaq, Kommuneqarfik Sermersuumi isumaginninnermut ingerlatsivimmi pisortaq Grethe Nielsen qulakkeerlugu taama oqarpoq.
- Inissiani allerni najugaqartussanut erseqqissunik malitassaqarpugut
Akisussaaffitsinnilu tamanna malipparput, Grethe Nielsen oqarpoq.
Siverth K. Heilmann illuatungiliuttut paragraf 37 malillugu apeqqutaanut akissuteqarnermini innersuussutigaa, tarnimikkut napparsimasut Namminersorlutik Oqartussat inissiaataannut innersuunneqarsimasut, isumaqatigiissutigineqartut malinnagit kommunip allanut inissittarsimammagit tamanna pakatsinartuusoq.
- Inissianut innersuussinissamut malittarisassaqarpoq - inissianullu taakkununnga pitsorluttut timimikkullu innarluuteqartut innersuuttarpagut.
Tarnimikkut napparsimasut inissianut allerniittunut innersuunneq ajorpagut - qulakkeersinnaanngilarpulli piffissap ilaani tarnimikkut nappaateqalernissaat, Grethe Nielsen oqarpoq.
Taassuma ilumuunnginnerarpaa, oqartoqarmat tarnimikkut napparsimasut pillugit inissiaatileqatigiiffiup saaffiginnissutaa kommunemit qisuariarfigineqarsimanngitsoq
- Kalerriisoqaraangat qisuariartarpugut innutaasorlu pineqartoq attavigineqartarpoq kommunillu neqeroorutigisinnaasaanik neqeroorfigalugu.
Ilumuunngilaq qisuariarneq ajortugut oqartoqarmat, ajornartorsiutit kalerriutigineqartartullu pillugit. Aamma eqqaasitsissutigisinnaavara kommunip inissiaatileqatigiiffia ataatsimeeqatigisaratsigu, Grethe Nielsen kommuneqarfik Sermersuumi isumaginninnermut sullissivimmi pisortaq oqarpoq.