Kommuneqarfik Sermersooq kajumissutsimik angallassisussarsiorpoq

Nuuk ullaassakkut 21/6-2016 nal. 3:15 Assi © : KNR/Steen Berthelsen
Allattoq Karsten Sommer
aggustip 22-at 2016 15:12

Innuttaasut pitsorluttut imaluunniit kaassuartakkanik issiaveqartut imaaliallaannarlutik nunamut aliannaarsaariarsinnaaneq-ajorput.

Tamanna Kommuneqarfik Sermersuup iliuuseqarfiginiarlugu, nammineerlutik pinngortitamukarsinnaanngitsunut aggustip 28-ani pisuttuartitsinialerpoq.
 
- Nalunngilarput utoqqarpassuarnut, piffissaq tamangajaat isersimasartunut, pinngortitamut qaqqamut immamullu aliannaariarnissaq qanoq pingaaruteqartigisoq. Qanga pisimasut utersaartutut ittarput, taamatullu misigisaqarnissamut Kommuneqarfik Sermersooq ikiuukkusuppoq. Aamma timip atornera peqqinnartuummat, Mikael Kemner, Kommuneqarfik Sermersuumi timimik sungiusaasoq taama oqarpoq.

Taamaammat aggustip 28-ani pisuttuartitsinermi inunnik kaassuartakkanik issiavinnik ingerlatsisussanik imaluunniit pitsorluttunik ikiuuttussanik Kommuneqarfik Sermersooq pissarsiorpoq.

- Assersuutigalugu Nuummi qanigisat imaluunniit innuttaasut utoqqaat arlaat ikiorsinnaavatit, kommuni taama allappoq, isumassarsiallu illoqarfinni allani atorneqarnissaa aamma neriuutigalugu.
 
- Ikiuunnikkut kikkut tamarmik nuannersumik misigisaqarluarnissaannik - namminerlu timigissaatigalutit - ikiuussinnaavutit, kommuni allappoq.
 
Kajumissutsiminnik suleqataarusuttut qanoq nalunaarsinnaanersut nittartakkatsinni atuarneqarsinnaavoq.