Kommuneqarfik Sermersooq: Innarluutilinnut sullissineq ajorseriarnavianngilaq

Malene Lynge taama akissuteqarpoq - innarluutillit angajoqqaavisa peqatigiiffiat, Inooqat, isumagininnermut sullissinerit ikilisaaffigineqarnissaannut ernummateqarluni qisuariarmat.

Malene Lynge akissuteqarnermini nassuiaateqarluni allappoq, kommunit kattunneqarnerisa kingorna innarluutilinnik sullissineq Namminersorlutik Oqartussanit kommuninut 2011-mi nuunneqarneranni ataatsimoorluni tapiissutit 97 millioner koruunit  ilanngullugit nuunneqartut. Ukiorli suli naanngitsoq aningaasat 100 million koruunit kommunnemit atorneqareersimapput.

Innarluutillit sullinneqarnissaannut Kommuneqarfik Sermersooq siorna 104 million koruuninik tapiiffigineqarpoq - innarluutilinnullu sullissinermi aningaasat katillugit 121 million koruunit atorneqarlutik. Taakkunannga 80 million koruunit Kalaallit Nunaani Danmarkimilu innarluutillit najugaqarfigisaannut inissiinernut atorneqarput. Innarluutillit 51-it Danmarkimut inissinneqarput Kalaallit Nunaanilu 78-it inissinneqarlutik. Innarluutilllit nunatsinnut inissinneqarnerinut inummut ataatsimut ukiumut agguaqatigiissillugu 380.000 koruuninik akeqarpoq. Danmarkimi 980.000 koruuninik akeqarluni.

Malene Lyngep tusagassiuutinut nalunaarutaa naapertorlugu - Danmarkimi innaarluutillit najugaqarfiinut  inissinneqarsimasut, maannakkut inersimasuusut, meeraallutilli Danmarkimi innarluutillit najugaqarfiinut inissineqarsimasut - taamanikkut ullumikkutulli nunatsinni innaarluutilllit najugaqarfiinik peqanngimmat.

- Innarluutillit najugaqarfigisaannut Danmarkimiittunut inissinneqarsimasut Kalaalit Nunaannut uternissaminnut kissaateqartut qulaajaaffigineqarnissaat ataatsimiititaliami kissaatigaarput -  nunatsinnilu taakkununnga naleqquttunik  neqerooruteqarsinaanersut misissorlugu, Malene Lynge innarluutillit  peqatigiiffiannut Inooqat akissuteqarluni taama allappoq.