Inissiat INI A/S-ip aqutai Nuummiittut Kommuneqarfik Sermersuup akisussaaffigilerusuppai.

Nunatsinnimi illoqarfiit pingaarnersaannut nuuttut amerligaluttuinnartillugit inissiat attartugassat amigaatingineqaleraluttuinnarput.

- Maannakkut iliuuseqartoqarnissaa pisariaqartipparput, Borgmester Charlotte Ludvigsen oqarpoq.

Nuna tamakkerlugu inissiat inoqanngitsut qanoq amerlatigineri Justus Hansenip (D) paragraf 37 atorlugu ineqarnermut naalakkersuisumut apeqqutigai. Nuummiinnaq init attartorneqarsinnaasut 108-t inoqanngitsut akissummi paasinarsivoq.

AAMMA ATUARUK Oquup ajornartorsiutaanera ingasaassaavoq

Nutarterineq, oquiaaneq, attartortikkuminaannerilu pissutigalugit init najorneqanngitsut, naalakkersuisup Karl Frederik Danielsenip akissummini allappoq .

Illoqarfimmilu kommuunip attartortittagaanut Iserit A/S-imut utaqqisut 2000-it sinneqartillugit Namminersorlutik Oqartussat Inissiaataat atorneqanngitsut atorluarneqarsinnaakutsoortut borgmesteri isumaqarpoq.

- Kommuneqarfik Sermersuumi inissaaleqinerup kingunerluutigisartagai annertuut naammattoortarpavut. Ilaatigut angerlarsimaffeqanngitsuuneq aammalu suliffeqarfiit illoqarfimmut sulisussaminnik pissarsiniarnissaannut periariarfissanik amigaateqarnerat, Charlotte Ludvigsen oqarpoq.

- Qularinngilluinnarparalu inissiat 108-t atornagit uninngatiinnarnavianngikkigut.

Ineqarnermut naalakkersuisoq Karl Frederik Danielsen KNR-imit kissaat pillugu oqaaseqartinniarsarigaluarparput ullumikkulli pisinnaanngilaq.