Kommuneqarfik Sermersooq atuartunut nerisaqartitsiinnarniartoq
Kommuneqarfik Sermersuup borgmesteria Charlotte Ludvigsen Sermitsiaq.AG-mut oqarpoq.
Atuartut nerisaqarnissaannut Naalakkersuisut ukiumut 1,4 millionit koruuninik aningaasaliissuteqartarput, taakkulu kommuninit qinnutigineqarsinnaasarlutik.
Aappaagumulli aningaasanut inatsimmi aningaasaliissutaasartut sipaarfigineqarput.
- Atuartuutitta nerisaqartinneqarnissaat pingaartilluinnaratsigu nammineerluta akiliuteqarsinnaavugut. Qularinngilluinnarpara meeqqat qaarsilaartut ilikkagaqarniarnissaq ajornannginnerutittaraat atuartuunerminnillu pissarsiaqarnerusartut, borgmesteri Inuit Ataqatigiinneersoq Nuuk Ugeavisimut oqarpoq.
Meeqqat atuarfiini atuartunut nerisassaqartitsinissamut Kommuneqarfik Sermersooq 980.000 koruuninik ukioq manna tapiiffigineqarpoq, aningaasartuutilli ilaminiinnanngui kisimik tapiiffigineratut borgmesteri oqarpoq.
Tapiissutilli peerneqarniarnerinut Naalakkersuisut paasititseqqaarsimannginneri isornartorsiorpai, kommunimmi aningaasanut missingersuutaat allanngortinnissaannut periarfissinnagit taama kingusitsigisukkut allanngortitsineri kusanaatsuunerarpai.