Kommuneqarfik Sermersooq aningaasanik kommuninut allanut tunniussissaaq

Aappaagumut aningaasanut inatsisissatut siunnersuut Aningaasaqarnermut naalakkersuisuisup Vittus Qujaukitsup saqqummiuteqqammerpaa. Kommunit akornanni oqimaaqatigiissitsineq pitsaanerusoq naalakkersuisut pilersikkaat, Vittus Qujaukitsup ilaatigut oqaatigaa. Naalakkersuisoqatigiinnili ilaasortanit arlalinnit illuatungiliuttuniillu kingorna isornartorsiuisoqarluni.
Allattoq Mads Lynge
septembarip 07-at 2013 17:31

Kommuneqarfik Sermersuumut ataatsimoortumik tapiissutit 20 millionit koruuninik taamaammat ilanngarneqarnissaat, naalakkersuisut siunnersuutigaat, aningaasallu takku kommuninut allanut tunniunneqartussanngornissaat siunnersuutigineqarluni.

Kommune Kujallermut ataatsimoortumik tapiissutit 8 millionit koruunik ilaneqarput, Qaasuitsullu Kommunianut tapiissutit 12 millionit koruuninik ilaneqarlutik. Aningaasat taakku 20 millionit koruunit tassa Kommuneqarfik Sermersuumit aaneqartussatut siunnersuutigineqarput.

Naalakkersuisut kommunit 2014-imut ataatsimoortumik tapiissutissaannut atatillugu isumaqatigiinniarnermi Kanukoka kommuninut tapiissutit agguaannerisa allanngornerat pillugu isumaqatigiissuteqarfiginiarsimagaluaraat, Kanukokalli siulersuisuisa tamanna pillugu isumaqatigiissuteqarfigineqarsinnaasimanngitsut, Vittus Qujaukitsup tusagassiutinut nalunaarummi ilaatigut oqaatigaa, Kommuneqarfik Sermersuup ataatsimoortumik tapiissutit agguaanneqartarnerat pillugu allannguutit akueriumasimanngimmagit.

Kommunit pingasut borgmesterii kommuninut aningaasanik agguaassisarneq pillugu Naalakkersuisunut isumaqatigiinniarnerit kingorna saaffiginnissuteqarsimapput, aningaasallu Kommuneqarfik Sermersuumit aaneqartussatut siunnersuutigineqarlutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq