Kommuneqarfik Sermersooq 2013-imi Suliniuteqartumut kajumissaasiivoq
Borgmester Asii Chemnitz Narup Kommunalbestyrelsip ataatsimiittarfiani malunnartitsisoqarnerani kusassarneqarsimasumi takkussimasunut uummammik pisumik tikilluaqqusisuuvoq, borgmesterillu tulliata aappaa Martha Abelsen, Aliikkusiarfik Ikinngut kajumissaaserneqarnissaannik nutaarsiassamik uppernarsaammillu tunniussisuuvoq.
Peqatigiiffik septembarip 28-iani ukioq manna aallarnerneqarpoq, ilaasortallu 60-it pallereerpaat, imigassartaqanngitsumik erinarsornermik qitinnermillu aliikkutaqarfiusarluni. Peqatigiiffik katersuuffiuvoq, imminnut aliikkusersoqatigiittarfiulluni inuttullu atteveqaatinik qitiutitsiffiulluni.
Nipilersortartut pikkorissut Kimmernaq aamma Frederik Elsner suliniuteqartumik kajumissaasiinissamut qaaqquneqarnertik ilassilluarsimavaat, tusarnersunillu tusarnaartitsisarlutik.
Suliniutilinnut kajumissaat pilersinneqarpoq innuttaasut Kommuneqarfik Sermersuumi najugaqarfinni inuiaqatigiinnik nukittorsaaniarlutik immikkut suliniuteqartut nersorniarlugit ataqqiniarlugillu – inuutissarsiornerup, kulturip imaluunniit inunnik sullissinerup iluani.
Kommuneqarfik Sermersooq Suliniuteqartumut kajumissaammik ukiut tamaasa tunniussisarnermini ukioq manna pingajussaaneerluni tunniussivoq. Decembarip aallartinnerani Paamiuni Tasiilamilu aamma Suliniuteqartunut kajumissaasiisoqassaaq, taakkulu Aliikkusiarfik Ikinngut peqatigalugit siornatigut kajumissaaserneqartarsimasunut ilaalissapput.
Grafisk designer Lis Stender, Nunatta Atuagaateqarfiani pisortaq Elisa Jerimiassen, Tasiilami Spejderit/Malene Jessen, Mette Sejrskilde Lyhne, Trine Holm Rosenberg aamma Rolf Pedersen, Nuummi Aliikkusersuisartut Isiginnaartitsisartullu Peqatigiiffiat (N.A.I.P), Immanuel Fonden aamma Jaappili Boassen Kulusummeersoq.
