Kommuneqarfiit kattuffiat nutarteriffiulerpoq

Kalaallit Nunaanni Kommunit Kattuffianni Kanukoka-mi aallaartitat immikkut ittumik Nuummi ippassaq ataatsimiimmata siulersuisut nutaat qinerneqarput, kattuffiullu nutaamik aaqqissugaanissaa aamma akuersissutigineqarluni.

Kanukoka-p aappaagu januaarip aallaqqaataaniit atuutilersussamik nutaamik aaqqissuunneqarnissaa aalajangiunneqarpoq, suleriarsinnaassuseq, naammassisaqarluarsinnaanissaq, aningaasanillu sipaaruteqarnissaq pingaarnertut anguniagaalluni.

Kommunit aaqqissuunneqarnerinut naleqquttumik suleriaaseqalernissaq matumani pineqarpoq.

Aallartitat immikkut ittumik ataatsimiinneranni aaqqissuussineq nutaaq aalajangiunneqarpoq:

Aallartitat ukiumoortumik ataatsimiittaraluariarlutik maanna ukiut sisamat qaangiukkaangata aatsaat ataatsimiittalissapput, kommunalbestyrelsinut qinersereernerup kingorna ataatsimiittassallutik.

Siulittaasoq piffissap affaani atorfeqartumik siulittaasuusalissaaq, borgmesterit aalajangersimasumik siulersuisunut ilaasortaasalissallutik.

Siulersuisunut ilaasortat akissarsiaqassanngillat, ataatsimiinnersiuteqartalissallutilli.

Siulersuisunngortussat ukiuni qaninnerni kattuffimmi ingerlatsinermi qulit aamma 20-t procentit akornanni sipaarutissarsiniassallutik.

Maannamut siulittaasuusimasoq Enok Sandgreen taarserlugu Martha Abelsen, Siumumeersoq, Kanukoka-mi siulittaasussatut qinerneqarpoq, aallartitanit tamarmiusunit 20-nit qinerneqarami.

Siulersuisunngortut, borgmesterit sisamat saniatigut, tassaapput Søren Alaufesen, Atassummeersoq, kiisalu Inuit Ataqatigiinneersut Mille Søvndahl Pedersen, Peter Olsen aamma Ingemann Dorph.

Suleqatigiissitat Kalaallit Nunaanni Kommunit Kattuffiat pillugu nalunaarusiorsimapput, kattuffiup siunissami aaqqissuunneqarnissaa pillugu nalilersuisuimallutik.

Periarfissat assigiinngitsut sisamat saqqummiunneqarput, suleqatigiissitalialli innersuussutaat tamakkerlugu malinneqanngilaq, aallartitat ataatsimiittarunnaarnissaat taakku innersuussutigigaluarmassuk, siulersuisullu sisamaannaarnik, tassa borgmesterinik, ilaasortaqalernissaat siunnersuutigigaluarmassuk.

Kanukoka-p siunissami aaqqissuussanissaa aappaagu januaarip aallaqqaataani atuutilissaaq.