Kommunenik nakkutilliisoqarfimmeersut Tasiilamiipput
- Sipaarfiusinnaasunik nalilersuineq aallarteruttorparput, taakkulu kommunip Aningaasaqarnermut ataatsimiititaliaanut aqagu ataasinngornermi nalunaaqutaq ataatsinut saqqummiutissavagut, taama Namminersornerullutik Oqartussat Nunami namminermi pissutsinut allaffiani pisortaq Leif Scharling angalaqataasoq ullumi ilisimatitsivoq.
- Ammassallip Kommuneani suut sipaarfiusinnaanersut tamakkiisumik paasisimalereerutsigit kommunalbestyrelse aamma ataasinngornermi juunip ulluisa aappaanni naapeqatigissavarput, suliat siunissami qanoq ingerlanissaannik piareersaasioqatigalugit, oqarpoq.
Kangia Kitaata kommunissaani borgmesterissaq Asii Chemnitz Narup aningaasarliorneq pillugu tallimanngormat ataatsimiinnermi Ammassallip Kommuneata immikkut ittumik aningaasanik 18,4 millioni koruuninik atukkerneqarnissaanik itigisartitsisimammat, Ammassallip Kommuneata aningaasaqarnera taamaalilluni Naalakkersuisoqarfiup nakkutigisarilissaneraa Leif Scharlingip maanna oqaatigerusunngilaa.
- Ilumut nakkutigineqalissanersoq oqaaseqarfigerusunngilara. Oqaatigiinnarsinnaavara Kommunenik nakkutilliisoqarfimmiit kommune peqatigalugu maanna sipaarfiusinnaasunik ujarleratta.
Suliaq tamaanga killikkallarpoq, allaffimmi pisortaq Leif Scharling oqarpoq.
