kommunemut qinigaasoq IA-mit anivoq

Kommuninut qinersereernerup kingorna Aasianni Inuit Ataqatigiit siulittaasuat kommunalbestyrelsemullu qinigaasoq Leo Rosing, attaviitsunngorallarpoq.

- Komunalbestyrelsep inissitsiterniarnerani oqaloqatigiinnerit assigiinngitsut misigisakka nuanniitsut pillugit, ukiunilu tulliuttuni sisamani sulinissap tunngavilerneqarnera toqqissisimananngitsumik isikkoqarmat, katersuunnerlu aalaqqajuttoq upperiaannartullu ittoq peqataaffigisinnaajunnaarakku, ullumimiit attaviitsutut inissikkallarlunga aalajangerpunga, Leo Rosing nalunaarummini taama allappoq. Leo Rosing kommunemut qinersinermi 74-inik taagunneqarpoq.

Leo Rosingip IA-mit attaviitsunngorallarneratigut Aasianni IA sinnerlugu kommunimut qinikkat arfinilinngorput, Aasiannilu kommunalbestyrelse aqqanilinnut inissaqarpoq.

Aasianni borgmesterinngortup IA-meersup Ane Hansen-ip Leo Rosingip attaviitsunngorallarnera paasisinnaannginerarpaa, Leo Rosing IA sinnerlugu isumaqatigiiniussisuusimammat Kommunemilu inissitsiterinerit isumaqatigiilluni inerneqarsimammata.