Kommunemiuna susoqartoq
Meeqqerivimmi Nuka-mi angajoqqaat nalornisooqisut kommunip akissutissaanut utaqqikatapput. Naammagittaalliutip tiguneranut uppernarsaat taamaallaat pisimavaat taamaattoq oktoberip 24-ata kingorna tusagaqaqqissimanngillat.
- Meeqqatsinnut qanoq kinguneqarumaarnera pillugu suli maannamut ilisimatinneqanngilagut. Paasissutissiisoqannginnera attaveqatigiittoqannginneralu toqqissiunnaarutaapput. Naammagittaalliuteqarnitsinni kaammattuutigisimagaluarparput oqaloqatigiinnikkut tamatuma qaangerniarneqarnissaa. Kisianni oqaloqatigiinnissaq ajornakusoortorujussuuvoq kommuni tutsiunneq ajormat, Nuka-mi angajoqqaat oqaaseqartitaat Gerth-Ole Larsen oqarpoq.
Meeqqerivinni inissat allanngortinniarnerannut kommunip suleriaaserilersaagaa tassaavoq atualertussat init atorunnaagaat meeraaqqerivinngortinneqassasut. Kommunip allanngortiterinerata kinguneranik meeqqanik nuutitsisoqarnissaa ilimagineqanngilaq.
- Tusarniaaneq novemberip 14-at naammassivoq maannalu saaffiginnissutit akinissaat piareersarparput. Akinissamut ullut aalajangersimasumik amerlassusillit atorneqassapput. Suliap suliarinerani misissueqqissaartoqareerpat siunissami suleriaasiulersussaq aalajangerneqassaaq, meeqqerivinnut akisussaasoq Flavia Lyberth KNR.gl-mut oqarpoq.
Meeqqerivik Nuka meeqqat ineriartornissaannut periarfissaqarluarpoq. Ullumikkut meeqqat illup iluani immikkoortuni assiginngitsuneersut ineriartuutaasunik assigiinngitsunik suliaqartarput soorlu suliffeqarfinnut pulaarlutik, eqaarsaarlutik, nalukkiarlutik atuakkanillu atorniartarfimmi filmertarlutik taakkulu saniatigut sapaatip akunneranut aalajangersimasunik sammisaqartarlutik soorlu kigutit paarilluarnissaannut tunngasunik. Taamaammat Nukami pissutsit ajorseriarnissaat angajoqqaat ernummatigaat.
- Ernumatigisavut kommunip tusaaniarsimasuuppagit paasisimassagaluarpaat meeqqat Nuka-miittut affaat ukiut sisamat tallimat qaangiuppata allannguinermit eqqugaassasoq. Paasisinnaalluarpara tusarniaanermi killiliisoqarmat taamaattoq kommuni akissuteqalaarsimasinnaagaluarpoq saaffiginnissupput tigusimallugut, Gerth-Ole Larsen KNR.gl-mut oqarpoq.
