Kommunefogedit sumiginnagaapput

Kommunefogedit nunaqarfippassuarni amingaataanerat aamma Kangaamiuni misigineqarpoq, Kangaamiunilu innuttaasut akornanni toqqissiviilliortoqartillugu isumaginnissinnaasunik peqanngimmat, nunaqarfimmi aqutsisuneersoq Tønnes Kreutzmann folketingimut ilaasortanut ammasunik allagaqarpoq.

- Peqqinissaqarfimmi qatserisarfimmilu sulisut pinartoqartillugu aggersarneqartarput, ilaannilu aamma uagut nunaqarfimmi aqutsisuni ilaasortaasugut kommunefogedissaqannginnatta saaffigineqartarluta. Kommunefogeditut atorfik inuttassaqarsimanngilaq sivisuumik, tamannalu peqquteqarpoq, kommunefogedit akissaataat annikippallaaqimmata. Aamma akissarsiaritinneqartut suliamut naleqquppallaarunnaarsimapput. Tønnes Kreutzmann oqarpoq nangillunilu: - Inuit soorlu apersortiffiup nalaani tikeraleraangata eqqissiviilliornerit amerliallattarput, suliassallu amerlanerulertarlutik, taamaammat mannakkut folketingimut ilaasortanut ammasumik allagaqarpugut, aamma ukiorpassuarni kommunefogedit atugaat naammagittaalliutigineqartartut annnertunerusumik iliuuseqarfigineqarneq ajorput. Suliaq kommunefogedinut tunngasoq sumut killinnersoq paaserusupparput, aammalu naalakkersuisut qanoq akuliutsinneqarsinnaanersoq paaserusullutigu. Aaqqiisoqartoqarneq ajornera uagutsinnut pillaanertut misigaarput, Kangaamiuni nunaqarfimmi aqutsisuni ilaasortaq Tønnes Kreutzmann oqarpoq.