Kommunefogedit amigaataanerat aaqqiiviginiarneqalerpoq

Kommunefogedit amigaataanerat aaqqiiviginiarneqalersoq, inatsisinik atortitsinermut naalakkersuisoq Aleqa Hammond oqarpoq.

Suleqatigiissitanik misissuigasuartussanik Aleqa Hammond maanna pilersitserusuppoq. Kommunefogedit aningaasarsiaat, sulinerminnilu atugarisaat qanoq aaqqiivigineqarsinnaanersut, suleqatigiissitat siunnersuusiorfigissavaat, aaqqiissutissatulli siunnersuutissat qaqugu tunniuteriissanersut naalakkersuisunut ilaasortap nalunaarutigisinnaanginnerarpaa.

Kalaallit Nunaanni politiit eqqartuussiviillu assigalugit kommunefogedit Danmarkimi inatsisinik atortitsinermut ministereqarfiup ataaniipput, pissutsinillu aaqqiisoqassappat inatsisinik atortitsinermut ministereqarfik suleqatigalugu aaqqiisoqassaaq.

Sukkasuumik aaqqiissuteqarniarnerit eqqartuussiveqarneq pillugu ataatsimiititaliarsuup sulineranit akimmisaartinneqartarsinnaapput.

Aleqa Hammondili neriuppoq kommunefogedit atugarisaat ataatsimiititaliarsuup sulineranit immikkoortillugit aaqqiivigineqarsinnaassasut.

Inatsisinik atortitsinermut Danmarkimi ministeri, Lene Espersen, Aleqa Hammondip qaammatip uuma ingerlanerani ataatsimeqatiginiarpaa.