Kommunefogedit akissarsiaat qaffassapput

Kalaallit Nunaanni oqartussat ikiortiginagit tamanna pissaaq, Politiit Namminersorlutik Oqartussat akileeqataatinniaraluarpaat.

Nunatsinni Politimesteri Rigspolitiillu sapaatip akunnera kingulleq isumaqatigiissutigaat kommunefogedit akissarsialunnerannut ajornartorsiut sukkanerpaamik aaqqinniarneqassasoq.

- Maanna paasiniagassaraarput Kommunefogedit qanoq akissarsiaqassanersut, tamannalu Rigspolitiinut oqaloqatigiissutigisassaraarput. Maanna suliap aallartinneqarnissaa pilersaarutaavoq, anguniarparpullu 2012-imi ukiup affaa siulleq qaangiuppat isumaqatigiissuteqarsinnaassalluta, Politimestereqarfimmi allaffiup pisortaa, Claus Lyngholm Risbjerg, ilisimatitsivoq.

Taassuma naliliinera naapertorlugu kommunefogedit akissarsiaasa qaffanneri nunatsinni politiit aningaasaqarnerannut sunniuteqarnavianngilaq.

- Kommunefogedit akissarsiaasa iluarsineqarneri Kalaallit Nunaanni Politiit aningaasat atorsinnaasaannut sunniuteqarnavianngilaq, Claus Lyngholm Risbjerg oqarpoq.

Kommunefogedinut atugassarititat pitsanngorsarniarlugit Politiit Namminersorlutik Oqartussanut kommunenullu kommunefogedit akissarsiaannut tapiissuteqaqqullugit saaffiginnissimagaluarpoq. Kommunefogedit taakkununnga aamma sullissisarmata. Eqqartuussiveqarneq pillugu ataatsimiititaliarsuup isumaliuutissiissutaani kommunefogedit kommuninut Namminersorlutik Oqartussanullu sullissisartut eqqaaneqarsimavoq.

- KANUKOKA-p Namminersorlutillu Oqartussat maannakkorpiaq tamanna oqaluusererusussimanngilaat, tamannalu tusaatissatut tiguarput, Claus Lyngholm Risbjerg oqarpoq.

Namminersorlutik Oqartussanit akissut erseqqareqaaq, taassalu naagga:

-  Naalagaaffiup ataani sulisuusut akissarsiaat Namminersorlutik Oqartussat isumagissussaanngilaat. Taamalu akissutaat erserippoq.

Kommuneniillu, allaffissanik taperseeqquneqarsimasunit, akissutigineqarpoq kommunit qanga kommunefogedit sulisissimanerlugit takussutissanik imaaliallaannaq nassaarsinnaanatik. Politiillu tamanna uppernarsarsinnaassappassuk kommunit aatsaat taperseerusupput.

- Uppernarsaatissanik ujarlernissatsinnut piffissamik atuisinnaanngilagut, Nunatsinni Politeqarfimmi allaffimmi pisortaq, Claus Lyngholm Risbjerg oqarpoq.

Nunaqarfiit inuttussusaat aallaavigalugu kommunefogedit akissarsisinneqartarput. Assersuutigalugu Kommune Kujallermi Tasiusami 86-inik inulimmi kommunefogedi qaammammut akileraarutit akilertinnagit 533 koruuninik akissarsisinneqartarpoq, ulloq unnuarlu sillimasussanut immikkut akissarsitinneqartarani. Tamassumali saniatigut suliaqaraangamik akunnermut akissarsisinneqartarput.