Kommunefogedip persutaasoq susinnaanngikkaa

 Niaqornaarsummi tigummigallakkanut inissiivissaqanngimmat, Aasianni politiit persuttaasoq ullut pingasut qaangiuttut aatsaat tigusaraat. Inissiiveqartitsinnginnerlu kommunefogedip toqqissisimanarinngilaa.

- Uannut toqqissisimanartanngeqaaq, taamatut atorfeqarluni. Ataasiarnagalu aperineqartarpunga sooq tigummineqannginnersoq, kommunefogedi Marius Jeremiassen oqarpoq.

- Uannuulluni toqqissisimanartanngeqaaq, taamatut atorfeqarluni. Taavalu ataasiarnanga aperineqartarlunga sooq tigummineqannginnersoq, akissutissameernartarpoq taamatut aperineqartilluni, inissiivissaqannginneq pissutigalugu tigummineqannginnerani, Niaqornaarsummi kommunefogedi Marius Jeremiassen taama oqarpoq.

Niaqornaarsummi angut 31-nik ukiulik angummik 27-nik ukiulimmik persuttaasoq, Aasiannut politiinut sapaatip akunnerata siuliani ataasinngornermi ullaassakkut nalunaarutigineqarpoq. Angut sakkulerluni persuttaasimasoq politiit paasiniaanerminni paasivaat. Silap ajornera pissutigalugu Aasianni politiit ullut pingasut qaangiuuttut aatsaat Niaqornaarsummut tikissinnaasimapput, angullu 31-nik ukiulik tigusaralugu. Ullunili taakkunani pingasuni angut 31-nik ukiulik tigummigallarneqarsinnaasimanngilaq.

- Amigaataasarpoq inissiivissaqarniarnerput, ilami nunaqarfinni kommunefogedit atugaat pissutsit ajorluinnaramik aamma, Tassami inissiivissaqarniarnerit atortutigullu allatigut ajornartorsiuteqartarpugut, Marius Jeremiassen oqarpoq. Niaqornaasuk 290-it missaannik inuttaasoqarpoq, nunaqarfimmilu kommunefogedip pinerluttoqartillugu paarsisussaagaangami nakkutilliiginnartutut inissittarpoq, namminermi najugarisamini tigummigallaasinnaanngilaq, pisariaqartippaaluni inissiiviliortoqarnissaa.

- Inissiiveeranngualiortoqarsinnaavoq, inummut ataatsimut marlunnulluunniit naammattumik. Uatsinnut toqqissisimanarnerussagaluarpoq inissiivissaqartitaagaluarutta, Niaqornaarsummi kommunefogedi Marius Jeremiassen oqarpoq.

Chefpolitiinspektør Henrik Mikkelsen nunaqarfinni inissiiveqarniarneq pillugu aqagu aatsaat oqaaseqarsinnaanerarpoq.