Kommunefoged-it atugarissaarnerulersimanngillat

-Ukiuni 18-ini kommunefoged-tut sulivunga, ullumikkullu qaammammusiaraakka 305,- kronet. Nunatsinni eqqartuussiveqarneq pillugu ullumi ataatsimeersuarnermi taama Igalikumi kommunefoged Nikolaj Egede oqaluttuarpoq. Kommunedfogetut akissaataannaanngitsutigut aammali allatigut atukkatik ima oqaluttuarai.

- Nunaqarfimminngaanniit nunaqarfimmut atugassaritat assigiinngitsut ilisimavakka. Nunaqarfinni inuttunerusuni kommunefoged-it inukinnerusuneersunit akissaatiginnerupput, inuttussuseq naapertorlugu akissaasersuisoqarmat, soorlu uanga qaammamut 305 kronenik aalajangersimasumik akissarsiaqartitaavunga, tamannalu akuersaarneqarsinnaanngilaq.

Nikolaj Egede oqarpoq kommunefoged-tut atorfimmini assigiinngitsunik amigaateqartarluni.

- 2002 aallartilaartorli atortut sulininni atorfissaqartitakka assigiinngitsut qinnuteqaatiginikuuakka. Radioaqqat, atisat masassinnaanngitsut parnaarussiveerarlu qinnutinnut ilaapput, ulloq mannali tikillugu kinguneqanngitsut.

Nunatsinni politimesteriusimasoq Eqaartuussiveqarnermullu Ataatsimiititaliarsuarmi ilaasortaq Jørgen Meyer oqarpoq nunaqarfinni kommufoged-it ajoqitut akissateqartinneqalernissaat Eqqartuussiveqarnermut Ataatsimiititaliarsuarmit innersuussutigineqartoq. 1997-mi kommunefoged-it misissuiffigineqarmata nalilerneqarpoq parnaarusseveeqqanik pisariaqartitsisoqanngitsoq.