Kommune: Sumiginnakkat ikiussagutsigit suleqatigiinnerusariaqarpugut

oktobarip 17-at 2006 13:59

Nuummi inuusuttuaqqat 13-init 17-innut ukiullit sumiginnakkat pinerluttunngorsimasut ullumikkut aqqaneq-marluupput, taakkulu amerliartuinnassanngippata kikkut tamarmik maannangaaq suleqataalluinnartariaqalersut Nuup Kommuneani meeqqanut ilaqutariinnermullu immikkoortortaqarfimmi ulluinnarni aqutsisoq Jakob Fencker-Noahsen isumaqarpoq.

- Meeqqat pineqartut annertuumik sumiginnagaapput killilersorneqartarsimannginnamillu killissartik nalusarpaat. Taamaattumik amerliartuinnassanngippata suliffeqarfiit, soorlu meeqqeriviit, sunngiffimmi sammisassaqartitsiviit allallu qanimut suleqatigiinnerusariaqalerpugut. Angajoqqaat ajornartorsiutillit matumani ikiorserneqartariaqartunut ilaapput, taakku ajornartorsiutinut nukissaqanngippata meeqqaminnut nukissaqarnavianngimmata. Jakob Fencker-Noahsen erseqqissaavoq.

Danmarkimi inuusuttuaqqat sumiginnakkat suliffeqarfiit suleqatigalugit angerlarsimaffiup avataanut inissinneqartarput, soorlu assersuutigalugu qarmaasup ilaqutaanut inissinneqartarlutik. Nunatsinnili periarfissaq tamanna savaatillit eqqaassanngikkaanni atorneqarpallaanngilaq. Taamaattumik suliakkiisarneq, suliassaqartitsisarneq tapertaralugulu katsorsaanerit ingerlanneqartalersuuppata meeqqanut sunniuteqarluartalissagaluartut Nuup Kommuneani meeqqanut ilaqutariinnermullu immikkoortortaqarfimmi ulluinnarni aqutsisoq Jakob Fencker-Noahsen isumaqarpoq.