Kommune Qeqertalimmi akigititat nutaat: Angajoqqaat isertitaqarnerpaat akiliutikinnerulissasut

Kommune Qeqertalimmi partiit suleqatigiit meeqqap ataatsip meeqqerivimmiitinnissaanut aappaagumit akigititat annerpaamik 1.000 koruuniutinniarpaat.

Aamma meeraaqqerivinnut meeqqerivinnullu akigititat assigiitsilerlugit ataatsimoortinnialerneqarpasipput.

Tassalu meeqqap arfinillit tungaannut ukiullip meeqqerivimmiitinnissaanut akigititaq annerpaaq maanna 1.890 koruuniusoq 1.000 koruuninut 2026-mi appartussaassaaq.

Tamannali taamaallaat kommunimi agguaqatigiissillugu 325.000 koruunit sinnerlugit isertitaqartunut iluaqutaassaaq, tassa kommunimi ukiumut agguaqatigiissillugu isertitaqartuninngarnit qaffasinnerusut.

Naatsorsueqqissaartarfiup kisitsisaatai nutaat naapertorlugit, kommunimi agguaqatigiissillugu siorna isertitat 236.000 koruuniupput.

Meeqqerivimmiititaqarneq 150.000 koruunit 324.999 koruunillu akornanni isertitalinnut tamanut akisunerulissaaq.

225.000 koruunit 249.999 koruunillu akornanni isertitallit qaffaaffigineqarnerpaassapput, tassami taakkununnga meeqqerivimmiititaqarnermut akigititat 397 koruuniniit 990 koruuninut amerlissapput. Tassa inuit taamatut isertitallit marloriaataa sinnerlugu akisunerulissapput.

Aamma 150.000 koruunit 249.999 koruunillu akornanni ukiumut isertitallit meeraat ukioqanngitsuniit marluk akornanni ukiullit  meeraaqqerivinniititaqarnissaat akisunerulissaaq.

- Inuiaqatigiinni naligiinngissutsimik annertusaassaaq

Tassa 325.000 koruuninik amerlanernilluunniit isertitallit kisimik meeqqerivimmiititaqarnissaat akikinnerulissaaq. 450.000 koruuninillu amerlanernilluunniit isertitallit ullumi akiliutigisartakkamik affaata missaanik akiliisalertussaassapput.

Tamannalu ernumanartoq kommunimi illuatungiliuttut Siumumeersut isumaqarput.

- Tamatuma takutippaa, isertitakinnerusut suli annertunerusumik akileraartinneqassasut. Tamanna inuiaqatigiinni naligiinngissutsimik annertusaassaaq, Kommune Qeqertalimmi inuiaqatigiinni akilersinnaanngitsunik pilersitsisinnaalluni, kommunalbestyrelsimut ilaasortaq Siumumeersoq Aqqa Samuelsen oqarpoq.

Ukiumut 149.000 koruunit tungaannut isertitallit meeqqerivimmiititaqarnermut suli akiliuteqartassanngillat.