Kommune Qeqertalik biilinut qatserissutinut 2024-mili aningaasanik immikkoortitsivoq, aningaasalli suli atorneqanngillat
Qasigiannguani Qeqertarsuarmilu biilinik qatserinermut tulluarsakkanik nutaanik pisinissamut 4 millionit koruuninik immikkoortitsisoqarpoq, aningaasalli pisariaqartinneqartunut suli atorneqanngillat.
Kommune Qeqertalimmi aningaasat 4 millionit koruunit, biilinik qatserinermi atorneqarsinnaasunik pisinissamut 2024-mi immikkoortitsisoqarpoq, aningaasalli atorneqanngillat.
Allattoq Brian Jensen
juunip 01-at 2026 07:30
Kommunalbestyrelse 2024-mi aalajangerpoq illoqarfiit taakku marluk tamarmik immikkut 2 millionit koruuninik nutaanik biilinik qatserinermi atortagassanik pisinissamut immikkoortitsisoqassasoq.
Aningaasat aappaaguani atorneqartussaagaluarput, ukiulli aappaa avillugu qaangiutereeraluartoq suli pisisoqanngilaq.
Kommunalbestyrelsimi ilaasortaq Aqqa Samuelsen (S) kinguartoorneq pillugu pakatsivoq:
-Tamannarpiaq pillugu aamma nammineerlunga uanga kommunalbestyrelsemi ilaasortatut, ujartuisarnikka naammatsiffigisutut ippakka. Iliuuseqartoqarnissaa massakkut pisariaqarpoq; tassa, Aqqa Samuelsen oqarpoq; nangillunilu:
- Biilersuit qatserutit nutaanngilinerat pissutigalugu, ikuallattoqalissagaluarpat ajutoortoqarujussuarsinnaanera ernummatigineqarsinnaavoq. Tassa biilit ukua nutaanngilipput, piffissarlu apeqqutaaginnaleqqavoq, biilersuit taakkua qaqagu ingerlasinnaajunnaassanersut.
- Ikuallanneq annertunerusumik ikuallassinnaavoq, imaluunniit qatserisartut biilersuarnik navialillutik ajutoorsinnaapput, Aqqa Samuelsen oqarpoq.
Kommune Qeqertalimmi upalungaarsimanermut pisortap David Løvstrømip oqarnera naapertorlugu, nammineerluni millionilikkaanik nalilinnik pisisinnaanermut pisinnaatitaaffeqanngilaq.
-Kontraktiliornerit aningaasaqarnermut pisortap, taakku suliarisarpai. Uagut innersuussisarpugut, ima ittunik pisariaqartitsivugut. Taakkualu anlægs kontominngaannik akilerneqartarmata, uanga akuersinissamut piginnaatitaaffinniit qaffasinnerusumut ingerlatittarpakka.
Upalungaarsimanermut pisortaq David Løvstrøm taama oqarpoq.
Kommune Qeqertalimmi aningaasaqarnermut pisortaq oqaaseqartinniaraluarparput, taannali akissuteqanngilaq.
Aamma borgmesteri Simigaq Heilmann attavigaarput. Taassuma aamma saaffiginnissuterput maannamut akissuteqarfiginngilaa.
