Kommune Kujalliup Narsarsuaq sakkutooqarfissaqqitsippaa
Nuummiut isumaqarput sakkutooqarfik Nuummi inissinneqassasoq, maanna aamma Kommune Kujalleq soqutiginnittunut ilannguppoq, sakkutooqarfiup Narsarsuarmi inissinneqarnissaa siunnersuutigineqarmat.
- Issittumi sakkutooqarfik Narsarsuarmi inissilli. Kommune Kujalleq qullersaqarfimmut angerlarsimaffiujumaqaaq Nuummullu sanilliullugu Narsarsuarmut inissinneqarnera takkuitsoorneqarsinnaanngitsumik iluaquteqaqaluni, tassa mittarfeqarpoq pitsaasumillu umiarsualiveqarluni, Kommune Kujalliup borgmesteria Simon Simonsen oqarpoq, nangillunilu:
- Narsarsuaq suliamut tassunga naleqqulluinnarpoq, timmisartorsuarnut mittarfeqarami taamalu Københavnimut toqqaannartumik attaveqarami sakkutooqarfiup inuttalersugaaneratigut allatigullu sulisoqarneratigut erseqqilluinnartunik iluaqutissartaqarpoq, Simon Simonsen oqarpoq.
Taanna Kommune Kujallermi sulisoqarnermut ataatsimiititaliami siulittaasumit tapersersorneqarpoq.
- Naalagaaffiup ingerlataasa Nuummut inissiortorneqarnerat kusananngitsuliorneruvoq, taamaammat sakkutooqarfik Narsarsuarmiitikkusoqaarput suliffissallu kommunitsinniilersussat iluarissaqaavut, Ole Mølgaard-Motzfeldt oqarpoq.