Kommune Kujalliup allaffeqarfissua oqummik eqqugaajualersoq
Illorsuup saqqaa sukumiinerusumik nutarterneqassanersoq, imaluunniit illorsuaq isateriarlugu nutaamik allaffiliortoqarsinnaanersoq maanna misissuiffigineqarpoq.
Pingaartumillu nutserisut kommunip allaffiani oquk naamasinnaavaat.
Niaqorlunneq, qasujaneq, sulisullu quersorpallaarnertik pissutigalugu napparsimakulasarnerat assigiingitsunillu malussarniartarneq atugaasoq, kommunimi nutserisoq Kaj Lyberth KNR-imut taama oqaluttuarpoq.
- Aserfallatsaaliisarnerit amerlasuut akisoorujussuusut eqqarsaatigissagaanni pitsaanerpaajussagaluarpoq nutaamik allaffissuarmik sanasoqarsinnaassagaluarpat, Kaj Lyberth oqarpoq.
Allaffeqarfiup saqqaa sukumiinerusumik iluarsaanneqassappat 2 millionit koruunit missaannik akeqassaaq. Isaterneqariarlunilu nutaamik allaffissualiortoqassappat tamanna 40 millionit koruuninik akeqassasoq naatsorsuutigineqarpoq.
- Periarfissat qanorlu akeqarsinnaanera misissortipparput. Qanorli aaqqiissuteqassanersoq politikkikkut aalajangerneqartussaavoq, allattoqarfimmi pisortaq Kim Dahl KNR-imut taama oqarpoq.
Qaqortumi kommunip qitiusumik allaffeqarfiata saniatigut Nanortalimmi Narsamilu kommunip allaffii aamma oqummit eqqugaajualersimasut qanoq iliuuseqarfigineqarsinnaanersut ilanngullugu misissuiffigineqarput.
