Kommune Kujallermi periarfissat ussassaarutigaat

Roskildemi Nunatsinnut tunngatillugu kulturikkut pikialaartitsinermi inuussutissarsiutit ippassaq sammineqarput.
Allattoq Jens Thorin
apriilip 05-at 2011 08:41

Sulinerup naanerani ataatsimiinnermi ippassaq ualikkut pisumi, inuit arlallit Nunatsinnik ilisimasaqarluartut, soqutiginnittunut Roskildemeersunut oqalugiarput. Suliffeqarfik Zealand Business Connection inuussutissarsiutinik ingerlatsisut suleqatigiinnerunissaannik ingerlatsiviusoq, ataatsimiinnermik aaqqissuisuuvoq.  Inuit 40-t missaanniittut tusarnaariarput.

Oqalugiartunut ilaapput Stig Rømer Winther, GTE-mi pisortaasimasoq, Greenland Developmentimi pisortaq Flemming Drechsel aamma Kommune Kujallermi borgmesteri Simon Simonsen.

Stig Rømer Wintherip oqalugiaammini Danmarkimi suliffeqarfiit niuernermik suliaqarnerminni, tamatuma kalaallinut iluaqutaanissaanik anguniagaqartariaqarnerannik kajumissaarpai. Tamanna suliffeqarfinnik aqutsinermi taaneqartarpoq Corporate Social Responsibility, CSR.

Greenland Developmentip pisortaa Flemming Drechsel aamma taama isumaqarpoq.

- Sumut iluaqutaassagami suliffeqarfinnik aatsitassarsiorniartunik tikisitsigutta, taakkua iluanaarutitik tamaasa annisissappatigik. Nunani allamiut suliffeqarfiutaat pisariaqartippavut, taamaattorli akuutittussaagamisigut paasisariaqarpaat, Flemming Drechsel oqarpoq.

Aatsitassarsiorneq, takornariartitsineq aamma Kommune Kujalleq pillugit oqalugiartoqareersorlu suliffeqarfiit Danmarkimiittut suliffeqarfinnik Nunatsinniittunik attaveqalersinnaanerminnut periarfissinneqarput.