Kommune Kujallermi isumaqatigiinniarnerit siulliit ullumi tallimanngornermi aallartissapput
Kommuninut marlunngormat qinersisoqarmat Siumut kommunit sisamat akornanni pingasuni amerlanerussuteqavissutut inissisimalerpoq, soorlu Kommune Kujallermi taama pisoqartoq. Siornatigullu naalakkersuisuusimasoq Jørgen Wæver Johansen qinigaanerpaalluni. Siumumi parteeqatini peqatigalugit isumaqatigiinniarnissanut siullernut taanna piareersaleruttorpoq:
-Isumaqatigiinniarnissanut siullernut piareersaleruttorpugut, partiillu kommunalbestyrelsimi ilaasortaatitaqalersut Inuit Ataqatigiit Atassullu aqagu ullaap tungaani ataatsimeeqatigissavavut, Jørgen Wæver Johansen, KNR-imut oqarpoq.
Isumaqatigiinniarnerit sapaatip-akunnerata tulliata ingerlanerani naammassineqarsinnaanissaat, taassuma neriuutigaa, kommunalbestyrelsimi sulineq aallartissinnaaniassammat:
-Qinigaaffik pisortatigoortumik maajip aallaqqaataani aallartissaaq, qinikkat qinigaasinnaanersut, Qinigaasinnaanermut Ataatsimiititaliap misileqqaartussaammagit. Sulinissarpulli qilanaaraarput, Kommune Kujallermimi ataqatigiittoqarnerusoqarnissaa partiit tamarmik ukioq manna qineqqusaarutigaat, Kommune Kujallermi borgmesterinngortussaagunartoq Jørgen Wæver Johansen oqarpoq.