Kommune Kujallermi isumalluartoqarpoq
Narsap Qaqortullu akornanni mittarfiliortoqarnissaa pillugu tungaanut aqqusinissap suliarineqarnerata aallartinneqarnera, borgmesterip ukiortaami oqalugiarnermini nuannaarutigaa, soorlu aamma mittarfiup piviusunngortinneqarnissaata Naalakkersuisoqatigiit isumaqatigiissutaanni qulakkeerniarneqarnera nuannaarutigigaa.
Kommune Kujallermi aaqqissugaanermut politikkeqalernissaq pillugu ukioq manna suliniuteqartoqalernissaa suliassat pingaarnerit ilaattut borgmesterip taavaa, suliat kinguneri uppernarsarneqarsinnaasumik takussutissiorneqartalernissaat suliniarnermi aallaaviunissaat aamma oqaatigalugu.
Meeqqat atuarfiannit atuareerlutik ilinniagaqalernissaminnut ingerlariaqqinneq ajortut amerlavallaarujussuarnerat iliuuseqarfiginiarneqarpoq, tassami atuareernermi kingorna unittooqqasut ilaatigut pissutaallutik inuiaqatigiinnut aningaasatigut artukkiisarnerat iliuuseqarfigineqartariaqarsorigamiuk.
Kommunit akornanni nalimmassaarutit aqqutigalugit Kommune Kujalliup 10 millionit koruuninik pissarsitinneqarnissaa Jørgen Wæver Johansenip kommuni sinnerlugu aamma nuannaarutigaa.
Takornariat Nunatsinnukartartut ataatsimut isigalugit ikiliartoraluartut, Nunatta kujataanukartartut amerliartorput. Umiarsuarnut ilaallutik takornariat Nunatsinnut aqqusaaraangata akiliutigisartagaasa minnerulersinneqarnerat aqqutigalugu takornariat amerlinerusinnaanissaat, borgmesterip aamma neriuutigaa:
- Maani kujataani sumiiffiit ilaasa nunarsuarmi eriagineqartussatut UNESCO-mi allattorsimaffimmut ilanngutsinneqarnissaanik siunnerfeqarnerup piviusunngortinneqarnissaa sulissutigissavarput, taamaaliornitsigut nunap immikkoortuata takornariarfissatut annerusumik nittarsaassinnaalerniassagatsigu, Jørgen Wæver Johansen oqarpoq.
Sisoraatinik oqilaniulluni Nunatsinni ukioq manna apriilimi pissartanngorniuttoqarnissaanut kujataani siullerpaamik aaqqissuisuusoqarnissaa, immikkut taasarialittut taassuma aamma nalilerpaa.
