Kommune Kujallermi inatsisinik sukaterilerput
- Soorunami ajuusaarutigeqaarput, taanna kialluunniit qularutigissanngilaa. Taamaattumik taanna tunngavigalugu maannakkut suliniuteqarpugut, siunissami assingusumik pisoqaqqinnginnissaa siunertaralugu, Kommuni Kujallermi Meeqqanut kultureqarnermullu ingerlatsivimmi pisortaq Jens Korneliussen KNR-imut oqarpoq.
Tassani pineqarpoq Iginniarfimmiu 40-nik ukiulik arlaleriarluni pinngitsaaliisarnini pillugu eqqartuussaaqqammersoq. Taassumalu kommuninit marlunnit niviarsiaqqanik sullitaqarnissaminik uppernarsaateqarani tikisitsisarsimanera, kingornalu pinngitsaaliisarsimanera. Suliami paasineqartut ilagaat, angutip taassuma uppernarsaateqarani niviarsiaraq kommuni kujallermiit akiliunneqarluni tikisissimagaa. Pisumilu tassani niviarsiaraq pasitsannermigut ajortoqannginnerani angerlaqqissimasoq eqqartuussinerup iluani saqqummiunneqarpoq.
Aamma atuaruk Angut 40-nik ukiulik sakkortunerpaamik pineqaatissinneqartoq
Taamaakkaluartoq kommuni kujallermi klubbimi sulisuuguit inuusuttunilluunniit sullissisuuguit qanoq iliorsinnaanersutit erseqqissarneqarnissaa pisup kingunerilertussanngorpaa:
Aamma atuaruk Inuusuttunik suliniartut Kommuni Kujallermut pinngitsaaliisoqarsimanera pillugu kamattut
- Piaarnerpaamik siunnersuusiussuugut, siunissami kommunip suliffeqarfiutaaninngaanniit tamakkununnga peqataatitaqartussanngortoqaraangat, suut suleriaatsit malinneqarnissaat, suut misissorneqarnissaat, qanoq ilisukkullu akuersisarnissaq, tamaasa erseqqissarlugit allattorsimanissaat.
Taakkunanilu sulisuuguit nammineq aaqqissuussinak kommunimut suliat ingerlateqqinneqartalernissaat piumasarineqartalissaaq.
Aamma atuaruk Eqqartuussaq aqutsisuunerarluni niviarsiaqqanik atornerluisoq
- 2013-imi ingerlanneqarsimasumi, ajuusaarnaraluaqisumik tassa suliaq sukkavallaarujussuarmik ingerlanneqarsimavoq, oqaasiinnartigullu pilersaarusiorneqarsimalluni. Taamaattumik aalajangerpugut siunissami aalajangiisarnerit ingerlatsivimmi akuerineqaqqaarlutik tamarmik aatsaat ingerlanneqartalernissaat.
- Imaanngitsoq klubbini ataasiakkaani imaluunniit uagut suliffeqarfiutitsinni ataasiakkaani. Taamaaliornitsigut qulakkeerusukkatsigu misissugassartai tamaasa misissoqqaarnissaat, Jens Korneliussen, Kommuni Kujallermi Meeqqanut Kultureqarnermullu pisortaq KNR-imut oqarpoq.
