Kommuni atorfinnut aalajangersimasunut suli atorfinitsitsisinnaassaaq. Kommune Kujalleq sulisussaaleqivoq, isumaginninnermut ingerlatsivimmi pisortamik, Atuarfeqarnermut, Meeqqeriveqarnermut Nutaaliornermullu Ingerlatsivimmi pisortamik inatsisilerituujunermillu maanna sulisussarsiorluni.Assi: Inuit Ataqatigiit

Kommune Kujalleq: Missingersuutinik sippuisoqarsimanerata sukannersumik aqutsisoqartileraa

Kommunip ukiup affaanut siullermut missingersuutai 17,4 millionit koruuninik sipporneqarsimapput. Taamaammat atorfinitsitsinerit pisariaqavinngitsunillu pisiortornerit unitsinneqarput.

Kommune Kujalliup aningaasaqarnera pitsaanngilaq. Kommuni aningaasanik taarsigassarsiniartariaqarsinnaavoq. Kommunimmi missingersuutai 17,4 millionit koruuninik juunip qaammataata naanerani sipporneqarsimapput.

Kommunalbestyrelse nutaaq apriilip naanerani atuutilerami missingersuutit 13,4 millionit koruuninik sipporneqarsimasut paasitinneqarpoq. Tassalu kommuni taamani politikerit aningaasanik piffissamut missingersuutigisaannit atuinerusimavoq.

Tamatumalu kingorna pitsaanerulinngilaq. Sippuinermi suli 4 millionit koruuninik juunip naanerani annerulerpoq. Tassalu 17,4 millionit koruuninik ukiup affaani siullermi atuisoqarpallaarsimavoq.

- Matumani pissutaavoq ingerlatsiviit missingersuutaareersunit atuinerusimanerat, borgmesteri Stine Egede (IA) kommunimit tusagassiuutinut nalunaarummi nassuiaavoq.

Atorfinitsitsisarunnaarallarneq

Iliuuseqartoqanngippat, missingersuutinik sippuineq ukiup nanerani kingunerlutsitsissasoq borgmesterip aarleqqutigaa

Taamaammat kommunip aningaasaqarnermut ataatsimiititaliaa sukannersumik aqutsilernissamik aalajangerpoq.

Kommunillu angalanerit pingaaruteqanngitsut unitsippai. Suliffeqarfimmilu nalilinnik pisiortornissaq kommunip pisortaanit qullersaanit akuerineqaqqaartassaaq. Taavalu atorfinitsitsisarunnaarallassaaq allaffissornermilu sulisut qaangiuttoorlutik sulisarunnaassapput.

Kommunili atorfinnut aalajangersimasunut suli atorfinitsitsisinnaassaaq. Kommune Kujalleq sulisussaaleqivoq, isumaginninnermut ingerlatsivimmi pisortamik, atuarfeqarnermut, meeqqeriveqarnermut nutaaliornermullu ingerlatsivimmi pisortamik inatsisilerituujunermillu maanna sulisussarsiorluni.

- Matumanimi pisortanik amigaatigineqartunik aamma inatsisitigut pisariaqavittunik soorlu atuarfinni sulisunik atorfinititsisinnaaneq ingerlaannassaaq, Stine Egede oqarpoq.

Sippuineq kommunip aappaagu aningaasaqarneranut kinguneqassanngippat, ukiup sinnerani sukannersumik aqutsinissaq pisariaqartoq borgmesteri oqarpoq.

Kommunip aningaasaqarnermut ingerlatsivia kommunip ingerlatsivii akimorlugit aaqqiissutissarsiornissamik suliakkinneqarpoq. Suliallu taassuma inernera aningaasaqarnermut ataatsimiititaliap aggustip ulluisa 25-anni ataatsimiinnerani saqqummiunneqassapput.

Kommunip aningaasaqarnikkut killiffini aningaasaqarnermut naalakkersuisoqarfimmut nalunaarutigereerpaa, kommunillu patajaatsumik aningaasaqarniarluni taarsigassarsinissaa siunniussanut ilaavoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat