Kommune Kujalleq Inuilillu nerisassianik inerisaasussanngorput

- Kalaallit nunaani pisortat suliffeqarfiutaat taakkununnga ilaallutik utoqqaat angerlarsimaffii, meeqqeriviit, peqqinissaqarfik ilaallu ilanngullugit 2008-mi inuussutissanik 256 mio kr-it nalinginut pisiniarsimapput. Aningaasat taakua minnerpaamik affai aalisartut, piniartut aammalu nunaatillit tunisassiaanik pisissutigineqartalersinaasuuppata aningaasarsiornermut peqqinnermullu iluaqutaasagaluarput. Ippassaq Narsami inuussutissat pillugit isumasioqatigiisitsisoqarmat Aalisarnermut, Piniarnermut, Nunalerinermullu Naalakkersuisoq Ane Hansen ilaatigut taamak oqaaseqarpoq.

Nunatta inuussutissanik nammineerluni pilersornerulernissaa anguniarlugu Inuussutissalerinermik ilinniarfik Inuili Kommune kujallermilu inuussutissarsiornermut immikkoortortaqarfik pilersaarusiortuussasut Kommune Kujallermi borgmester Simon Simonsen oqarpoq.

- Kommuunitsinni Inuussutissarsiornermut pisortatta Inuilimilu pisortap suleqatigiillutik oqallinneq pilersaarutinillu piviusunngortitsiniarneq ingerlatissavaat. Naatsorsuutigilluinnarparput inerisaanernik ingerlatissasut, Simon Simonsen oqarpoq. Kujataani savaatillit inuussutissrasiutinillu allanik ingerlatsisut soorlu taornarialerisutneriniartarfiutillillu suleqatigineqassasut aamma eqqarsaataavoq.