Kommune Kujalleq: Inissaaleqisitsineq pakatsinaqaaq

Tamanna pillugu borgmester Simon Simonsen ilaatigut ima oqarpoq:

- Inuusuttut sapinngisamik amerlasuut ilinniakkamik aallartitsisarnissaat pisariaqartipparput. Inuusuttulli ilinnialersut pitsaasunik nutaaliaasunillu aamma ineqartussaapput. Taamaattumik kollegiat amerlanerusut ullutsinnut naleqquttunik atortulersukkat pisariaqartinneqarput. Matumani ilinniarnertuunngorniat Niuernermillu Ilinniarfimmi ilinniartut kisiisa eqqarsaatiginagit, kisiannili aamma inuusuttorpassuarnut inuussutissarsiutitaarniarlutik ilinniagaqarniarlutik Piareersarfimmi aallartittunut, borgmester Simon Simonsen oqarpoq.

Taamatut oqaaseqarpoq, Qaqortumi Piareersarfiup kollegiaataasa ilaanni oqoqarnera paasineqareersorlu, tamannalu pissutigalugu Piareersarfik ilinniartunut aqqaneq marlunnut allami inissarsiuussinissamut pisariaqartitsileriataarluni.

- Qaqortumi kollegialiornissamut aningaasaliissutissat, aappaagumut aningaasanut inatsimmi peerniarneqarnerat, Kommune Kujallermi aamma ajuusaarutigeqaarput, borgmesteri oqarpoq.

Kalistat Lund, Kommune Kujallermi Inuussutissarsiornermut Suliffeqarnermullu ataatsimiititaliami siulittaasoq ilaatigut ima oqarpoq:

- Kollegiani inissaaleqineq pissutigalugu, Qaqortumi aamma Narsami Piareersarfinni aallartinniarlutik qinnuteqartunut itigartitsisariaqalersinnaaneq pakatsinaqaaq. Tamanna aamma ilinniartunut, suliffimmik ilinniarfissaminnik neriorsorneqarsimasunut, kollegianili inissarsisinnaanngitsunut aamma atuuppoq.

Taamaattumik kollegialiortiternerup aallartinneqarnissaanik, Kalistat Lund Naalakkersuisunut kaammattuivoq.