Kommune Kujalleq: Atugassarititaasut assigiinnginnerat pissutaavoq
- Taama isumaqartoq tassaalluni Kommune Kujallermi aningaasaqarnermut pisortaq Kim Rosendahl. Taassuma tusagassiuutinut nalunaaruteqarluni kommunit akunnerminni akileraarutitigut naligiissaarisarnerat uparuarpaa, tassami Kommuneqarfik Sermersooq immikkut akiliuteqartaraluartoq, kommunit sisamaasut akornanni aningaasatigut naligiimmik atugassaqartitsisoqanngimmat.
Taassumali nassuerutigaa, Kommune Kujalliup aningaasarsiornikkut ilungersunartorsiorneranut pissutaanerpaasoq tassaammat 2007-imi akileraartarnerup suliarineqartarnerata qitiusumut nuunneqarnera.
AAMMA ATUARUK Kommune Kujallermi aningaasatigut ingerlatsineq ajortumik ingerlavoq
- Akileraartitsisarnermut tunngasut qitiusumit aqutarineqalermatali akileraarutigineqartartut allanngornerat kommunip malinnaaffigisinnaajunnarpai. Taamanimiit qaammatikkaartumik kommunit akiliuteqarfigineqarallartalerput. Akiliutigineqarallartut amerlassusissaat Akileraartarnermut Aqutsisoqarfimmit taamanikkut missingersorneqarpoq. Tamatumali kingorna paasinarsivoq, Kommune Kujalleq piffissami sivisujaami amerlavallaartunik akiliuteqarfigineqarallartarsimasoq. Tamatuma kingorna tunniunneqarallartut amerlavallaarutaat Namminersorlutik Oqartussanut utertinneqartussanngorput, Kim Rosendahl allappoq.
Tamatumunnga peqatigitillugu nassuerutigaa, kommunip taarsersuinissamik isumaqatigiissutip siulliup malinnissaa ajornakusoortissimagaa. Isumaqatigiissutimmi malinnissaanut kommunip aningaasaqarniarnera ilungersunarpallaarsimammat, taanna erseqqissaavoq.
Taamaattumik Kommune Kujalleq sivisunerusumik taarsersuinissamut Namminersorlutik Oqartussanut nutaamik isumaqatigiissusiortariaqarsimavoq. Taannalu malinneqassaaq.
Aningaasaqarnermut pisortap oqaatigaa, kommunip aningaasaqarnikkut aqutseriaatsimi aaqqissuunneratigut taarsersuinissamik isumaqatigiissut malillugu akilersuisinnaanissani qulakkeertussanngoraa.
- Naak naligiissaarutit suli nunatsinni innuttaasut tamarmik - kommunillu sisamat akornanni - naligiimmik atugassaqartitaanissaannut suli qulakkeerinnittunngorsimanngikkaluartut, Kim Rosendahl taama naggasiivoq.
