Kommune kujalleq annertunerusumik ikiugassaavoq
Kommune Kujallermi isumaginninnikkut suliat nukinginnartut naammassineqanngitsullu annertummata Naligiissitaanermut Isumaginninnnermullu Naalakkersuisoqarfiup Qitiusumik Siunnersuisarfimmi sulisut pingasut kommunimut aallartippai.
Taamatut iliornikkut sulianik nukinginnarnerpaanik Kommune Kujallermut ikiuunnissaq siunertaarineqarluni.
Suliat meeqqanut inuusuttunullu tunngasut pisariaqartitamik suliarineqarnissaat qulakkeerniarlugu, Namminersorlutik Oqartussani sulisut tallimat kommunimut aallartippai, Isumaginninermut Naalakkersuisoqarfik tusagassiuutinut tallimanngornermi ippassaq nalunaaruteqarluni taama allappoq.
- Kommunip pissutsit atugai ernumanartorujussuupput, taamaattumik suliassaqarfimmi pinasuartumik iliuuseqarnissap salliutinnissaa pingaaruteqartutut isigaara, Naalakkersuisunut ilaasortaq Martha Lund Olsen taama oqarpoq.
Suliap ingerlanerani tamarmi kommuni pitsaasumik kingunissalimmillu oqaloqatigineqartartoq erseqqissaatigalugu.
Suleqatigiinnissamut isumaqatigiissut ulloq 1. juni atututilersussaq novemberip naaneranut atuuttussaq naalakkersuisoqarfimmi maanna ilusilersorneqarpoq.
Naalakkersuisoqarfiup Qitiusumik Siunnersuisarfianni sulisut marluk siulittaasorlu qanittumi Narsamut suliartorlutik aallarpput, taakkuali suliaat annertummata ilaneqarnissaat pisariaqarsimavoq.