Kommune Kujalleq aningaasanik pissarsivoq

Namminersorlutik Oqartussat ukioq-mannamut 2012-illu aallartilaarnerata tungaanut sanaartornissamut 160 millionit koruuninik maanna aningaasaliinialerpoq.

Nakussassaaneq tamanna Kommune Kujallermi borgmesterip, Simon Simonsenip, qujaruteqaa, suliffissaqartitsillunilu akileraarutitigut isertitsiffiussammat.

Borgmesteri oqarpoq, aningaasat taakku Nanortalimmi elevhjemiliortoqarnissaanut ilaatigut atorneqassasut, taannalugooq sananeqarluni aallartinneqangajalereerpoq, Qaqortumi austisteqartunut angerlarsimaffiliortoqassaaq, Qaqortumilu kollegialiortoqarnissaanut septembarimi aamma suliariumannittussarsiuussisoqassalluni.

Qaqortumi nutaamik, aqqaneq-marlunniit 14-it tikillugit initalimmik, inissialiortoqassaaq, taanna ukiaru aallartisarneqassalluni. Nanortalimmi ilaqutariinnut aamma illuliortoqassaaq, Qaqortumi utoqqaat illussaat ukioq-manna ukiup naalernerani aallartisarneqassaaq, 2012-ip aallartilaarnerani sanaartorneqalissalluni, kiisalu Nanortalimmi atuarfimmi kigutileriffiliortoqarnissaanut aamma aningaasaliisoqassaaq.

Sanaartugassat katillugit 154 millionit koruunit 162 millionit koruunillu akornanni akeqassasut, Simon Simonsen ilisimatitsivoq.