Kommune killiliiffigineqarani oqaaseqarsinnaatitaanermik innarliineragaavoq
Uranimik piiaanissamik pilersaarneq pillugu Narsami innuttaasut ataatsimiinnissaraluat peqatigiiffimmit Earth Charter Narsamit aaqqissuunneqartoq, ippassaq taamaatiinnarneqarpoq, kulturikkut illumik piginnittoq, Narsap kommunea, illumik atoqqusinngimmat.
Narsap Kommuneani Meeqqanut Kultureqarnermullu Immikkoortortaqarfimmi pisortaq Suka K. Frederiksen pisoq pillugu apersorneqarusunngilaq, uppernarsarpaalu nammineq itigartitsisuulluni.
Aaqqissuisut aalajangersimasumik isummereerlutik, kulturimut tunngassuteqanngitsumik ataatsimiisitsiniarsimanerat itigartitsinermut tunngavigitinneqarpoq.
Pisoq Kommune Kujallermi ikaarsaariarnermut ataatsimiititaliami ilaasortap Lisbeth Søvndahl Pedersenip(IA) Qaqortumeersup assut kusanaagaa, oqarluni innuttaasut allatut isumallit killilersorneqartut. Tassami siornatigut ataatsimiinnerit kulturimut tunngassuteqanngitsut illumi tassaniingerlanneqartareermata.
- Isumaqarpunga taamaaliorneq demokratiimik innarliisoq, Lisbeth Søvndahl Pedersen oqarpoq.
- Pisortat illuutaat innuttaasut illuutigaat, taamaattumillu pissutsit pillugit oqalliffittut atorneqartariaqarlutik. Qanorluunniit oqallisigisassamut akerliutigigaluaraanni illersuitigigaluaraanniluunniit, Lisbeth Søvndahl Pedersen oqarpoq.
Innuttaasut amigartumik paasissutissinneqartarnertik pillugu aamma naammagittaalliuteqarsinnaajuartariaqarnerarpai.
Aamma allanik uranimik piiaanissamut akerliusoqarmat, suut naammagittaalliuutaanersut suullu isorinnissutaanersut inatsisartunit oqartussanillu allanit immikkoortissinnaasariaqarnerarpaa.
Illup siunissami sumut qanorlu atorneqartarnissaa qanittukkut aalajangiiffigineqassaaq.