Kommune: Akiligassap 90 procentia isumaqatigiissutigivarput

Pilersaarutit ingerlalluaannassappata Nuummi parnaarussivissap nunagissarneqarnera ukioq manna aallartissaaq. Aamma kina parnaarussivissamut aningaasaliisussaaneranik isumaqatigiinniarnerit iluatsilerput, Kommuneqarfik Sermersuumi sanaartornermut avatagiisinullu pisortaq oqaluttuarpoq. Kalaallit akileraartartuisa parnaarussiviliorneq akileeqataaffigissavaat.
Allattoq Knud Reimer
marsip 09-at 2012 13:08

Nuummi savimminilinnik eqqaavissuup eqqaani parnaarussiviliornissamut nunagissaanissaq 31 millionit koruuninik naleqartussap qallunaat naalagaaffiata kisimi akilissaneraa sivisuumik assortuussutaanera amerlanerit tusartareerpaat.

Ruujorerpassuit pilersuisussat parnaarussiviinnarmut iluaqutaasussaannginneri neqitsiullugit qallunaat naalagaaffiata aningaasartuutissat tamarmik akilerumasimanngilaat Nukissiorfiillu akileeqataasariaqarnerat unnerlugu.

Tamanna nunatta tungaaniit ulloq manna tikillugu isumaqataaffigineqanngilaq, akileraartartuusugulli aningaasaleeqataasussanngornitsinik kinguneqartumik isumaqatigiittoqarpoq.

- Uuma suliap inissinneqarnissaa Nukissiorfiit ilungersuukkaat malugisinnaavara. Aningaasaleeqataanissamummi Nukissiorfimmiut isumaqataalersimapput, suliassamut tunngasut 90 procentii isumaqatigiissutigineqareerput.

Kommuneqarfik Sermersuumi sanaartornermut avatagiisinullu pisortaq Torkild Lauridsen unnersiorpoq.

Suliassamulli aningaasaliinissamut tunngasut procentit qulit suli isumaqatigiissutigineqanngillat. Nukissiorfiit pisortaasa ilaata Henrik Estrupip oqaasii malillugit erngup aqqutaa millioninik tallimanik nalilik Nukissiorfiit aningaasartuutissanut missingersuutaani ilaatinneqanngitsoq isumaqatigiinniutigineqarpoq.

Isumaqatigiinniarnerni illuatungeriit oqarneri malillugit qaammatit marlussuit qaangiuppata isumaqatigiinniarnerit naammassissapput.

Parnaarussivissamut aningaasartuutissat ukiuni marlunni assortuussutaareerlutik nunatta aningaasaleeqataasariaqarnera paasiartorneqalersimarpasippoq.

- Isumaqatiinniartut tamarmik piviusorsiorpalaarlutik naaperiarsimapput. Uangalu isumaga malillugu naapertuilluarnissaq isumaqatigiinniartut akornanni pingaartinneqarsimavoq.

Kommunep sanaartornissamut pilersaarutaanut Thorkild Lauridsenip tapiliussassaa akuerineqaqqajaasoq oqaatigineqarpoq, apriilimilu tusarniaassutigineqarnissaa naatsorsuutigineqarluni. Tusarniaatitsisoqareerpat kommunalbestyrelsip aamma akuereqqaartariaqassavaa, tamannalu aggustusimi pinissaa ilimanarpoq.

Suna tamarmi iluatsissappat ukioqqippat nunagissaanerit aalartissapput. Tassanilu suliassani siulleq tassaavoq aqqusinniornissaq.

- Aqqusinniornissamut akuersissutissaq inissinneqariarpat aqqusinniorneq ukiup massuma 2013-imilu ingerlanneqarsinnaanngussaaq.

Parnaarussivissap qaqugu atorneqalernissa suli iluamik ilisimaneqanngilaq, piffissaliussaasormi kinguartinneqartuarsimammat. Nalunaarutigineqartulli kingulliit upperissangaanni ukioq 2017-imi parnaarussivik atoqqaarfissiorneqassaaq.