Kommune ajornartorsiortoq aningaasanik aqutsisussarsiorpoq

Qaasuitsup Kommunia, aningaasatigut ajornartorsiorfiusoq, aningaasanik ingerlatsinermut pisortamik ilinniarsimasumik amigaateqarpoq.
Allattoq Elisa Isaksen
februaarip 24-at 2010 05:38

- Taamaattoqartillugu KANUKOKA ikiuussinnaavoq. Kommunili aallaqqaammut nammineertinniaqqaartarparput, namminnerli pisariaqartitsisutut misigigunik KANUKOKA-mut saaffiginneriaannaapput, taava ikiuutissagatta, KANUKOKA-p siulittaasua, Enok Sandgreen oqarpoq.

- Qaasuitsup Kommuniani pisortaanissarsiorpugut, taannalu atorfinikkuni nammineerluni aningaasanik ingerlatsinissamut pisortassarsiortussaavoq, borgmester Jess Svane oqarpoq.

Suliffissaqanngitsut amerlisimanerat, taakkulu aningaasatigut ikiorserneqartarnerat, Qaasuitsup Kommuniata aningaasatigut ajornartorsiorneranut ilaatigut pissutaavoq. Aamma kommuniusimasut akiitsui Qaasuitsup Kommunianut akiligassanngortinneqarnerat pissutaaqataalluni.

Innuttaasut kommunimut suli akiligassaqarnerat kommunip karsianut aamma ajornartorsiutaavoq. Akiligassat25 millionit koruuninik 2009-mi qaffapput, 149 millionit koruunit missaanniilerlutik.