Assi: Kommuneqarfik Sermersooq

Kommunalbestyrelsit ataatsimiinneri tv-kkut malinnaavigineqarsinnaalissasut

Kommuneqarfik Sermersuumi kommunalbestyrelsimut ilaasortat tulliani ataatsimiippata, tamanna KNR 2-kkut isiginnaarneqarlutik malinnaavigineqarsinnaapput. KNR-imit neriuutigineqarpoq kommunit allat aamma taama neqeroorfigineqarsinnaassasut.

 

 

Ataatsimiinnerit TV-kkut toqqaannartumik malinnaavigineqarsinnaaneri, kommunalbestyrelsemi ilaasortanit tamarmiusunit aalajangerneqartoq, Kommuneqarfik Sermersuup borgmesteriata, Asii Chemnitz Narupip nalunaarutigaa oqarluni, tamanna kommunimi innuttaasut oqartussaaqataanerannik peqataanermillu misiginissaat pigaartinneqarmat, taama aalajangerneq pisimasoq.

- Kommuneqarfik Sermersuumi tamanut ammanerpaanissaq tunngavigaarput. Tamannalu nakittorsassavarput siunissami kommunalbestyrelsip ataatsimiineri toqqaanartumik TV-kkut aallakaatittarneqarnerisigut, Asii Chemnitz Narup allappoq imalu nangilluni.

- Kommunimut pingaaruteqarpoq innuttaasut ajornanngitsumik paasiuminartumillu peqataasinnaanermik misiginissaat aamma inuit ataasiakkaat eqqarsaatigalugi taakku soqutigisaat naappertorlugit sulianut malinnaasinnaaneri nukittorsarneqassallutik, borgmesteri, Asii Chemnitz Narup allappoq.

KNR 2-kkut aallakaatinneqartartut ilaatigut tassaapput Inatsisartut ataatsimiinneri. Inatsisartullu ataatsimiinneranni kommunalbestyrelse ataatsimiissagaluarpat taakku ataatsimiinneri immiunneqarlutik kingusinnerusukkut aallakaatinneqartassapput.

Kommuneqarfik Sermersuumi kommunalbestyrelse tulliani ataatsimiissaaq septembarip 29-anni, tassalu tamanna TV-kkut toqqaannartumik malinnaavigineqarsinnaassalluni.

KNR-imit oqaatigineqarpoq, Nunatsinni kommunini kommunalbetsyrelsit tamarmik, Sermersuup Kommuniatut neqeroorfigineqarumaartut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat