Kommunalbestyrelsinut qinigassanngortinniartut kingusinnerpaamik aqagu nalunaassapput
Partiit aamma kisimiillutik qinigassanngortittut, imaluunniit kisimiillutik qinigassanngortittut kattusseqatigiittut qinersinissamut qinigassanngortittut, qinigassanngortittutut aqagu marsip ulluisa tallimaanni ulloqeqqanut kingusinnerpaamik nalunaarsimassapput, nalunaarullu taanna Qinersinermut Ataatsimiititaliamut tunniunneqassalluni.
Qinigassanngortittup qinigassanngortinnermut nalunaarutiminik tunuartitsisinnaaneranut periarfissaq kingulleq aamma tassaavoq aqagu ulloqeqqanut.
Qinersinermik siulersuisut qinigassanngortittut qinigassanngortinneri atortussaatinneqarnersut pillugit aalajangiissapput, tamatumalu kingorna aalajangerneq pillugu qinigassanngortittut inuillu attaveqaataasut aalajangernermik nalunaarfigissallugit.
Nunaqarfimmi aqutsisunut qinersinermi qinigassanngortinniarlutik nalunaarusuttunut ulloq killiliussaq kingusinnerulaarpoq, tassa qinigassanngortittutut marsip ulluisa 23-anni ulloqeqqanut kingusinnerpaamik nalunaartoqassammat.
Nunaqarfimmi aqutsisunut qinigassanngortinnermik nalunaarutiginninneq kommunelbestyrelsinut qinigassanngortinnermut assigiingissutigaa najukkami qinersisitsisumut nalunaarutigineqartassammat, kommunalbestyrelsinut qinersinermi Qinersinermik Ataatsimiititaliamut nalunaarutigineqartarluni.
Qinersinermik siulersuisut matumani aamma kingorna aalajangiissapput qinigasanngortittunik nalunaarutit atortussaatinneqassanersut.
Ilagiit sinniisaannut qinersinermi qinigassanngortinniarlutik nalunaarnissaannut piffissaq kingulleq tassaavoq aqagu marsip tallimaanni aamma ulloqeqqanut.
