Kommunalbestyrelsinngortut sulillutik aallartinnissaat kinguarsarneqartut
KANUKOKA-p siulittaasuata Jens Lars Fleischerip Naalakkersuisut siuilittaasuannut Hans Enoksen-imut allagaqarluni assorsuaq isorisariaqartuunerarpaa, Kalaallit Nunaanni Politimesterip suleriaatsimik allanngortitsinermigut Qinigaasinnaanermut Ataatsimiititaliap kommunalbestyrelsinut ilaasortanngorlaanik akuerinninniarneranik kinguarsaanera.
Suleriaatsimik allanngortitsinerup komunalbestyrelsit nutaat qinigaaqqammersut piffissap atuuffissamik maajip aallaqqaataani 2005-imi aallartittussap aallartisimatsiarnerani inissititersinnaanerannik akornuserpai.
Siornatigut Qinigaasinnaanermut Ataatsimiititaliat, qinigaasimasut allattorsimaffiannik politiinut nassiussereeraangamik, qinigaasimasut pineqaatissinneqarsinneqarsimasinnaanerannik paasissutissanik pisariaqartunik ingerlaannartumik pissarsisinnaasaraluarput. Maannali suleriaaseq allanngortinneqarsimavoq, paasissutissanik tamakkuninnga Qinigaasinnaanermut Ataatsimiititaliat tunineqarsinnaassappata kommunalbestyrelsimut ilaasortanngorlaat pisinnaatitsissummik atsiortariaqarlutik.
-Suleriaatsimik allanngortitsineq tamanna qinersineq sioqqullugu piffissaalluarnerani ilisimatitsissutigineqarsimasariaqaraluarpoq, taamaalillutik pisinnaatitsissutit pisariaqartut atsiorneqarsinnaagaluarmata, kommunalbestyrelsimut qinigassanngortilluni nalunaaruteqarnermut atatillugu.
Pissutsit maanna atuutilersimasut kommuninut nammakkiisussaapput, maajimi kommunalbestyrelsimut ilaasortanut borgmesterillu taarserneqarfigisaanni borgmesterinut marloriaammik akissarsialiisussanngornikkut, Jens Lars Fleischer naalakkersuisut siulittaasuannut allappoq, kissaatigalugulu pissutsit piaarnerpaamik aaqqiivigineqarnissaat sulissutigissagaa.
