Kommunalbestyrelsimi ilaasortaq aaffarmi saliisitserusuttoq

Nassuuttuumi aavartartut igitakorpassui qimaannakkat takussaapput, taamaammat kommuunit Naalakkersuisullu ikioqatigiillutik saliisariaqartut kommunalbestyrelsimi ilaasortaq isumaqarpoq.

Aavariarfigineqarluartartoq Nassuttooq eqqaalu aavariartartut atortukuinik, soorlu umiatsiakunik, dunkikunik atortunillu allanik mingutsinneqaleraluttuinnarpoq.

Taamaattumik Kommune Qeqertalimmi kommunalbestyrelsimut ilaasortaq, Inuit Ataqatigiinnersoq Kristian Jerimiassen, siunnersuuteqarpoq Pinngortitamut Naalakkersuisoqarfik, Qeqqata Kommunia, Avannaatalu Kommunia suleqatigiillutik Nassuttooq salittariaqaraat.

- Umiatsiakut, nerisakut sinneri, dunkikut, taavalu aavarluni atorfissaqartitat assigiingitsut nassarneqartartut qimaannakkat suuneri pillugit Kristian Jeremiassen nassiuaalluni taama oqaluttuarpoq.

Kristian Jeremiassenimmi Nassuttuumi aavartartunit mingutsitsisoqarnera uppernarsarniarlugu saleeqatigiittoqarnissaanut siunnersuuteqannginnermini asserpaalunnik katersisimavoq.

Jeremiassen: Kinguaassagut pillugit saliisariaqarpugut

Nassuttooq Qeqqata Kommuunianneersut, Kommune Qeqertalimmeersut, Avannaatalu Kommuunianeersut aavariarfigilluartagaraat.

- Ima annertutigilersimapput tamarmik tiguneqarsinnaanatik. Taava taamaalilluni eqqagakut aavarfimmi ukiorpassuarni mingutsitsisussaallutik, Kristian Jeremiassen oqarpoq.

Tamannalu pinngortitamut uumasuinullu peqqinnanngitsoq Kristian Jeremiassen isumaqarpoq. Taamaattumik taassuma saliisoqarnissaanut aningaasaliisoqarnissaa siunnersuutigaa.

Siunnersuuteqartulli saliineq qanoq akeqassanersoq naatsorsorsimanngilaa.

- Akissaqartariaqarpugut. Uumasut pinngortitarlu massakkut mingutserneqarput. Taakkualu aamma kinguaassatta atorsinnaaniassammatigit suliarineqartariaqarpoq. Akisuneruliinnassaaq taama isikkoqartinneqaannaruni, Kristian Jeremiassen oqarpoq.

Viceborgmesteri tapersiivoq

Kristian Jeremiassenip ukiuni qaninnerni saliisoqarsinnaanissaa neriuutigaa.

Nassuttoorli kisimi pinnani pinngortitami aamma allami mingutsitsisoqaqisoq, Qeqqata kommuuniani borgmesterip tullersortaa, Siumumeersoq Gideon Lyberth, oqarpoq.

Taamaammat taassuma pinngortitami igitakunik saliinnissaq kommuunit Naalakkersuisullu ikioqatigiiffigisariaqaraat taperserpaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat