Kommunalbestyrelsimi amerlanerussuteqartut Asii Chemnitz Narup tapersersorpaat
Demokraatit ilaasortajunnaarnisaq kissatigereerpaat. Aamma Naalakkersuisut ataatsimoortumik aappagu tapiissutissatut siunnersuutiminnik allanngortitsereersullu ilaasortaneq Inuit Ataqatigiit apeqquseriaannaavaat:
- Vittus Qujaukitsup borgmesterit allat pingasut, uagut avaqqulluta, isumaqatigiissusiorfigisimammagit isumaqarpunga tamanna apeqquserneqartariaqartoq. Taamaammat KANUKOKA taava sumut atussavarput? Eqqartoqqittariaqaripput isumaqarpunga, ilumut uagut Kommuneqarfik Sermersuumi tapersersorneqarsinnaanngikkuttta taava KANUKOKA pisariaqartipparput? Mille Søvndahl Pedersen, Inuit Ataqatigiit sinnerlugit Kommuneqarfik Sermersuumi kommunalbestyrelsimi ilaasortat siulittaasuat oqarpoq.
Kommunerlu kommunit kattuffiannit KANUKOKA-mit ilaasortaajunnaarnissani periarfissaraa. KANUKOKA-p malittarisassaani ilaatigut allassimavoq, ilaasortaajunnaarnissaq periarfissaasoq, tamannalu pissasoq siulersuisunut allakkatigut ukiumik ataatsimik siumut ilisimatitsilluni ukiup naatsorsuiffiup naanissaanut. Kattuffimmit tunuarnermi kommune tunuartoq Kattuffimmit piumasaqaateqarsinnaanngilaq.
Kommuneqarfik Sermersuumilu Demokraatit borgmesteri Asii Chemnitz Narupip oqariartuutaanik tapersersuipput, Demokraatimmi kommunit kattussuunneqarmatali oqaatigiuarsimavaat Kommuneqarfik Sermersooq kommunit kattuffianni KANUKOKA-mit ilaasortaajunnaartariaqartoq:
- Kommunit kattussuunneqarmatali Demokraatinit oqaatigiuarnikuuarput KANUKOKA-mi ilaasortaajunnaartariaqartugut, Demokraatit sinnerlugit Kommuneqarfik Sermersuup kommunalbestyrelsiani ilaasortap aappaa Justus Hansen oqarpoq.
Kommuneqarfik Sermersuup KANUKOKA-mi ilaasortaajunnaarsinnaanissaa pillugu Atassutip kommunalbestyrelsiani ilaasortaatitaata Erling Madsenip suli oqaaseqarfigerusunngilaa, ilaasortaajunnaarnerup kommunimut kingunerisinnaasai paaseqqaarusukkamigit.
Siumut Kommuneqarfik Sermersuumi ilaasortaatitaasa siulittaasuat Martha Abelsen maanna angalasoq oqaaseqartinniaraluaratsigu iluatsinngilarput.
