Kommunalbestyrelsemi inuk nutaaq
Karl Davidsen Maniitsumeersoq kommunalbestyrelsemiit juulip aallaqqaataani atulersussamik tunuarniuteqarpoq. Ilaquttanilu Nuummut nuuttussanngoramik inuttaa isumaqarpoq kommunalbestyrelsemi suliani Qeqqata kommuniani unitsittariaqassallugit.
Karl Davidsen kommunalbestyrelsemut qinigaavoq Atassut sinnerlugu kingusinnerusukkulli Siumumut nuulluni.
- Partiimik tunuliaqutaqarluni qinigaasimagaanni, qinersinerup inernera qinersinerup naanissaata tungaanut naalagaasussaavoq. Taamaattumillu sinniisussaq Atassutip allattorsimaffianiit tiguneqassaaq, allattorsimaffillu malillugu Godmand Rasmussen sinniisussatut siulliulluni, Qeqqata kommunabestyrelseata ileqquusumik juunip 16-ani ataatsimiinnissaanni oqaluuserisassani taamatut allassimavoq.
Inassutigineqarpoq Godmand Rasmussenip juulip aallaqqaataaniit kommunalbestyrelsemi ilaasortaalernissaa akuersissutigineqassasoq. Taanna siornatigut Sisimiut kommunalbestyrelseani aamma inatsisartuni ilaasortaanikuuvoq.
