Kommune Kujallermi pisortaaneq toqusoq
Kommune Kujallermi pisortaaneq Kim Dahl 56-inik ukioqarluni sapaammi toquvoq.
Kommune Kujalleq taama nalunaaruteqarpoq.
- Angut inoqatiminut asannittoq, tamanut inissaqartitsisoq, ikinngutaalluartoq, unneqqarissumik ingerlatsisoqarnissaanik pingaartitsisoq Kim Dahl, Kommune Kujallermi innuttaasunut qinikkanullu tunniusimalluarluni sullissilluartoq annaavarput, Kommune Kujallermi borgmester Kiista P. Isaksen kommunalbestyrelsi sinnerlugu eqqaaniaalluni allappoq.
Kim Dahl isumaginninnermut siunnersortitut ilinniarsimavoq, ilinniakkanilu atorlugu Qaqortup kommunerisimasaani sulisimalluni.
Tamtuma kingorna Kommune Kujallermi allattoqarfimmi pisortatut sulereerluni pisortaaninngorpoq.
- Kimmip nulia kinguaavisalu annaasaqarneranni misiginneqatigingaarpakka. Kimmip siuisippallaamik qimagunnerani annaasaq annertoqaaq, maqaasissaqaarput, eqqarsaatitsigulli ilagiuarumaarparput, borgmester Kiista P. Isaksen allappoq.
