Kollegiet najukkatut naleqqutinngitsut taarserniarpaat

Kollegiani inissiat 300 nutaat Nuummi sananiarpaat. Kollegiat arlallit najugarineqarsinnaajunnaartut matuneqarput.
Allattoq Noah Mølgaard
novembarip 08-at 2012 09:26

Nuummi Kujallerpaani kollegiat pisoqalilluinnarsimasut nutaanik taarserneqassamaalerput. Illutoqqat 1960-ikkunni sanaat maanna aserfallassimaqaat blokilu ataaseq najugarineqarsinnaajunnaarmat matuinnartariaqarsimavaat.

Kujallerpaani kollegialiornissamik suliap aallartinnissaata siuartinnissaanik Naalakkersuisut qinnuteqaataat aningaasaqarnermut ataatsimiititaliamit akuersissutigineqarpoq. Pilersaarutit malillugit kollegiat nutaat sananissaannik suliaq 2013-mi aallartittussaagaluarpoq. Maanna suliaq ukiormanna aallartinneqassasoq aalajangiunneqarpoq.

- Kujallerpaani ilinniartut inaat pitsaanngitsupilussuupput oqoqarlutillu. Taamaattumik sumiiffiup ineriartortinneratigut ilinniartullu inaannik 300-ut tikillugit amerlassusilinnik sanaartornikkut ilinniartut inaasa taarsernissaat Naalakkersuisunit kissaatigineqarpoq, aningaasaqarnermut ataatsimiititaliaq ataatsimiinnermi imaqarniliami allappoq.

Kollegiallumi aserfallassimaqisut ukiuni arlalinni ajornartorsiutaapput.

- Kujallerpaani bloki ataaseq matusariaqarsimavarput najugarissallugu naleqqutinngilluinnarmat taannalu suli matoqqatinneqarpoq, Nuummi kollegiani pisortaasoq Salome Lennert Petersen KNR.gl-mut oqarpoq.

- Rotary kollegia aamma siorna matusariaqarsimavarput taanna aamma najugarissallugu naleqqukkunnaarmat, Salome Lennert Petersen nassuiaavoq.

Centerkollegia Blok P'p ilaaniittoq matuneqareerpoq. Taassumali taartissaa ukiortaariitsiarpat Julemærkekollegiap ungasinngisaanik atulissaaq.

Siornatitut napparsimasut najugaqarfiat Hotel Nuummiittoq aamma kollegiatut suliarineqarpoq inillu ilaat maanna atulereerput. Ilinniartitaanikkulli suliniutit annertusarneqarnerat kollegianik amerlanerusunik ullutsinnullu naleqquttunik pisariaqartitsiffiuvoq.

- Maluginiarparput ilinniartunngortartut amerlasuut inersimasuunerusut. Arlaqarput ilaqutsioreersimasut taamalu kollegiani inissanik anginerusunik pisariaqartitsisut. Kollegiani ineeqqat amerlasuut ataasiuttariaapput ullutsinnullu naleqqukkunnaarsimallutik. Taamaammat kollegiat nutaat iluaqutaassaqaat, Salome Lennert Petersen oqarpoq.

Naalakkersuisut suli aningaasaqarnermut ataatsimiititaliamut ilisimatitsissutiginngilaat Kujallerpaani kollegiat nutaat qaqugu iserterfigineqarsinnaalersimassanersut.