Ilinniakkaminnik aallartitsiniartut 37-it Nuummi kollegiani inissaqartinneqanngillat.

Kollegiassaaleqineq : Ajornartorsiut aaqqinniarlugu inissianik attartorsinnaaneq partiit ujartorpaat

Kollegiassaaleqinerup aaqqiissutissaannik Siumut, Atassut aamma Demokraatit ujartuipput. Ilinniagaqartut ukiup ingerlanerani taamaatiinnartartoqarneratigut kollegianik inissaqalertartoq, Doris J. Jensenip Siumumeersup eqqaavaa.

Ilinniartunut inissiat Nuummi amigaataammata, ilinnialersussaagaluit ilaasa ilinniarnissartik unitsiinnartariaqarpaat.

Ilinnialersussat 37-t ilinniartut ineqarfiini inissarsinngitsoorput.

Inatsisartunut ilaasortat arlaqartut aaqqissutaasinnaasunik siunersuuteqarput: 

-  Iliniartut inissaqartinneqarnissaanut periarfissanik assigiinngitsunik maannakkuugallartunik qinaasisariaqarpugut.  Tassa ilinniarniarlutik  qinnuteqarsimasut inissaqarnissaat qulakkeerniarlugu tassaunga ilanngullugu attartorneq aqqutissaasutut Siumuminngaaniit isumaqarfigivarput.

Siumut sinnerlugu ilinniartitaanermut oqaaseqartartoq Doris Jensen taama oqarpoq.

Siumut kisiartaalluni taama siunnersuuteqanngilaq. Atassut aamma Demokraatit inissianik piffisami sivikitsumik attartornikkut aaqqiisoqarsinnaasoq taakkua oqarput. 

-  Attartorallarnikut immaqa aaqqiissuteqarsinnaanermut ujatuisoqarsinnaanera aaqqiissutitsialaasinnavoq piffisami sivikitsumi.

Atassutip siulittaasua Aqqalu C Jeremiassen taama oqarpoq.

Iinniagaqartunut inissat 200-it aappagu 2023-mi piariissapput, taamaattumik ilinniagaqartut piffissami sivikitsumi ineqartinneqarnissaannut inissianik attartornissamut Namminersorlutik oqartussaat akilertariaqaraat, partiit isumaqarput.

Doris J Jensenip Siumumeersup eqqavaa, ukiup ingerlanerani ilinniagaqartut ilinikkaminnik taamaatitsigaangata, kollegiani inissaqalertarneq.

Eqqaamasariaqarparput massakkut ajoraluartumik ilinniartorpassuit aallartikkaluaannarlutik ilinniarnerminnik unnititsisarput. Taavalu ukiup ingerlanerani kollegianik inissaqartitsisoqalertarpoq. Taamaattumik attartorallarsinnaaneq taakkununnga 37-nut periarfissaq misissorneqartariaqartoq, Siumumit isumaqarpugut, Doris J Jensen taama oqarpoq.

Ilinniagaqartut inissaannik qangali sanaatortoqarsimannginnera Demokraatinit uggornartinneqarpoq, - ukua kollegianut tunngasoq ajornartorsiut utertuartoq ukiut tamaviisa uteqattaartuartoq siusinnerusukkut iliuuseqarfigineqasimannginera uggornartuuvoq. Piffissaq sivisooq isumagineqarsimannginneri aanna sumiginnaaneruvoq annertoor akuersaarneqarsinnaanngitsoq, Demokraatit siulitttaasuat Jens-Frederik Nielsen taama oqarpoq.

Taamaatitsisarnerit suliffinnilu misiliisarnerit

iIinniarfiit aaqqissorneqarnerisa nalilersuiffigineqaqqinnissat aaqqiissutissaasinnaavoq, ilinniarnermi praktikkerfiit illoqarfinni allani ingerlanneqasinnaagamik. Siumut isumaqarpoq nalilersueqqittoqartariaqartoq, - Ilinniarfinni illinniartuuteqarnermullu tunngasut aaqqissuuteqqinneqarnissaat pisariaqarpoq. Tassa ilaatigut praktikkeqattaarluni angalasaqattaarnerit taakkua nalilersoqqineqartariaqarput aningaasarpassuarnik naleqartarmata, Siumut ilinniartitaanermut oqaaseqartartua Doris J Jensen taama oqarpoq.

Ilinniartitaanermut Naalakkersuisoq Peter Olsen, Nuummi ilinniagaqartunut inissanik amigaateqarneq pillugu oqaateqartinniaraluarparput iluatsinnaguli.

Taanna akissuteqarluni allappoq, angalanini pissutigalugu apersorneqarsinnaanani.

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl