Kollegiaqarnermik aaqqissuusseqqinneq Ili Ili-mit taperserneqarpoq

Ilinniartut isertitaat aallaavigalugit kollegiamut akiliutigineqartartut inissinneqassapput.

Naalakkersuisup Nick Nielsenip tamanna ilimasaarutigereerpaa, ilinniagaqartummi ullumikkut ilaqarput ilinniakkami saniatigut suliffeqarnermikkut ukiumut qaffasissorujussuarnik aningaasarsiaqartartunik, aningaasarsiallu taakkua assersuutigalugu SIK-p isumaqatigiissutaani minnerpaamik akissarsiaasinnaasunit qaffasinnerujussuusarput, taamaakkaluartorlu kollegiani najugaqarnerminni qaammammut 850 koruuniiginnartarlutik.

- Siunertaanngilluinnarpoq inuusuttut ilinniagaqarnermi saniatigut suliffeqarusuttut pillarneqarnissaat. Ilinniagaqartut ataasiakkaat namminneq aalajangissavaat ilinniagaqarnerup suliffeqarnerullu iluini qanoq piffissamik atuiniarnerlutik. Kisianni pissutsit assigiinngitsut maanna aaqqissuussinermi atuuttut aaqqiivigisariaqartut uagut Naalakkersuisuni isumaqarpugut, Nick Nielsen oqarpoq.

Ilinniartitaanernut periusissiap aamma Ilinniartitaanermi pilersaarut II-p suliarineqarneranut atatillugu ilinniartut Naalakkersuisunik oqaloqateqartarsimapput.

- Naalakkersuisunik oqaloqateqartarsimanerput nuannaarutigaarput, tassami piumassuseqarluta suliani ilusilersueqataagatta. Naalakkersuisut uagutsinnit ilinniagaqartuusunit tusagaqarnissartik soqutigisimavaat, siunnersuutillu tunniussagut sulianut ilaalersissimallugit, Ili Ili-mi siulittaasoq Kikkik Olsen oqarpoq.

Siulittaasorlu Kikkik Olsen nangilluni oqarpoq:

- Nuannaarutigaarput tusaratsigu Naalakkersuisut sulissutiginiaraat ilinniagaqarnersiutit siunissami ukiumoortumik akit qaffakkiartornerannut malinnaatinneqartalernissaat, aammalu aningaasanik attartorsinnaanermut periarfissat pitsaanerulersinneqarnissaat ataatsimut tulleriiaarinermi ilaatinneqarumaartut. Ilinniagaqartunut ataatsimut isigalugu atugassarititaasut ajorseriartinneqanngippata, illuatungaatigulli pitsaanerulersinneqarlutik, ILI ILI iluarisimaarinnippoq. Tamatumunngalu tunngatillugu qularutissaqanngitsugut oqaatigineqarpoq.

Ilinniartitaanernut periusissiaq aamma Ilinniartitaanernut pilersaarut II Ilimmarfimmi maajip ulluisa 19-ianni nal 16:00 saqqummiunneqassaaq oqallisigineqarlunilu.

Iluarsaaqqinnermut atatillugu sulineq 2016-imi aningaasanut inatsisissap suliarineqarnissaa tikillugu ingerlanneqassaaq.