Kollegiani inissaaleqinerup ilinnialernissaq unitsissinnaavaa

Københavnimi kollegiani inissaaleqisoqarmat kalaallit ilinnialersussat ilaasa aallartinnissaq nalorninarsivoq. Kalaallit Illuutaanni Københavnimiittumi ilinniartunut siunnersorti Pia Rosing Heilmann taama oqarpoq.

Danmarkimi kollegiassaaleqineq inuusuttunullu inissaaleqineq aatsaat taama ajortigaaq.

- Ukioq manna ajornartorsiuteqaqaagut, qallunaat amerlaqisut allartittussaapput, utaqqisullu amerlallutik. Aamma Kalaallit ilinniartussat utaqqisuniipput. Tassalu Kalaallit Nunaanneersuulluni  Danmarkimilu ilaqutaqarani qanorlu iliornissaq nalugaanni, maani ilinnialissalluni ajornakusoorsinnaavoq, Pia Rosing Heilmann oqarpoq.

Pissutsillu najummatsisimanarput. CIU-p, ilaatigut Københavnimi kollegiani inissanut inuusuttunullu inissianut qitiusumik innersuussisarfiup, naatsorsuutigaa, ilinnialersussat hundredit arlaqartut septembari aallartippat inissaqassanngitsut. Taamaammat kalaallit ilinnialerusuttut ilaat aamma aallartinngitsoorsinnaasut, Pia Rosing Heilmannip aarleqqutigaa.

Taassuma oqaluttuaraa, kalaaleq inatsisilerituunngorniarluni ilinnialersussaq ullumi saaffiginnissimasoq oqarluni, GU-mi angusani pitsanngorsarlugit pikkorissareeruni imaassinnaasoq angerlaannartariaqassalluni. Taanna maanna namminerisamik najugaqanngilaq, ilaquttamilu nalunngisaaniilluni.

Utaqqisut allattorsimaffianni 240-tut allassimavoq, initaarnissaminullu ukioq ataaseq sinnerluguluunniit utaqqisinnaagami, ilinnialerfissamini aallartissinnaanngilaq.

Allat qassit taamatut inissisimalersimanersut, Københavnimi Kalaallit Illuutaaniit  ilisimanngilaat.

Kisianni Sjællandip avataani ilinnialernissamik qinnuteqarsimasunut pissutsit ajunnginnerusut, Kalaallit Illuutaasa sinneri nalunaarput. Odensemi ilinnialersussat inissaqarnissaat, kommunimit qularnaarneqarpoq, aamma Aalborgimi kollegiassaqarniarneq nunap sinneranisulli ajortiginngilaq. aamma kalaallit Århusimi ilinnialersussat qularnaarunneqarsimapput, kollegiani inissanut inuusuttunullu inissianut utaqqisunutallattorsimaffinni siullertut allaqqasussanngorlugit. KøbenhavnimiluKalaallit Illuutaat assigusumik aaqqissuussiniarniarpoq.

- Uagut aamma siunissami taamaakkusuppugut. Neriuppugut, kollegianik suleqateqarsinnaalluta. Taava Kalaallit Nunaanniit tikeqqammertut tassani ukioq siulleq najugaqarsinnaapput, tikereerunillu inimik allamik ujarlersinnaallutik, Pia Rosing Heilmann oqarpoq.

Fynimi Jyllandimilu Kalaallit Illuutaat tamarmik kollegiaqarput, 15-niit 20-t tikillugit inissalinnik. Tamarmilli ulikkaareersut oqaatigineqarpoq. Københavnimi Kalaallit Illuutaat kollegiaqanngilaq.

Inuusuttut Nunatsinneersut 400-nik amerlanerit Danmarkimi ukiaq manna ilinnialerumallutik qinnuteqarsimapput. Qassit akuerineqarsimanersut, Kalaallit Illuutaanniit suli erseqqissumik ilisimaneqanngilaq. Kisianni Odensemi neriuutigineqarpoq, 70-it aallartissasut, Aalborgimi 100-it, Århusimi 90-it Københavnimilu 130-it.