Kollegialiortut akiliisinnaajunnaarput

Nuummi ilinniartunut inissarserusuttunut nuanninngitsumik tusagassaqartitsivugut.

Nuuk Total Constructions ApS, ilinniartut ineqarfissaannik Nuummi sanasut, suliffeqarfittut akiliisinnaajunnaarpoq. Tamanna pissutaalluni sulisuni akissarsitinngimmagit tallimanngormat sulisut angerlartiinnartariaqarsimapput.

Ilinniartut ineqarfissaat februaarip aallaqqaataani naammassereersimasussaagaluarpoq, naammassinngimmalli nalunarallarpoq qaqugu naammassiumaarnersoq.

Suliffeqarfik Greenland Ground Construction a/s-imeersoq Allan Bo Jensen siuttoralugu ilinniartut inissaat sanaartorneqarput. Maannakkut Nuuk Contruction ApS-imit qanoq iliortoqassanersoq misissorneqartoq, Allan Bo Jensen oqarpoq:

- Suliffeqarfik Nuuk Total Constructions ApS nammineerluni oqartussaagaluarpoq. Nalunngilara suliffeqarfik aningaasaqarnikkut ajornartorsiortoq, maannakkullu misissorpaat qanoq iliorsinnaanerlutik.

Greenland Ground Construction a/s-imi pisortaq Allan Bo Jensen KNR-imut oqarpoq.

Ilinniartut inissaat sananeqarmata siunertarineqarpoq naammassippata ilinniartut angajoqqaavinit pisiarineqassasut.

Ilinniartut inissaaleqinerujussuat pissutigalugu ilinniartut ineqarfissaat 66 millioni koruunilerlugu Naalakkersuisut suliffeqarfimmit Greenland Ground Construction a/s-imit pisiaraat.

Nuuk Total Construction ApS-ip akiliisinnaajunnaarnera pissutaalluni maanna ilisimaneqanngilaq qaqagu ilinniartut inissaat naammassissanersoq. Greenland Ground Construction A/S-p pisortaa Allan Bo Jensen oqarpoq, qanoq iliortoqassanersoq maannakkut misissorneqartoq.

- Ilinniartut inissaat naammassiniarlugu sulisussanik allanik piareersimasuuteqarpugut Allan Bo Jensen oqarpoq.

Nuuk Total Construction ApS pisoq pillugu oqaaseqartinniaraluaratsigu iluatsissinnaasimanngilarput. Aamma Ineqarnermut Sanaartornermullu Naalakkersuisoq Jens B. Frederiksen oqaaseqartinniaraluaratsigu aamma iluatsinngilarput.