Kollegia 40 millioni koruuninut
Kollegia aningaasartuutikitsumik ingerlanneqarsinnaasoq ilinniartunut 40-nut inissanik Arktisk ingeniørinngornianut sananeqalersoq ukiut marluk qaangiuppata Sisimiuni atulissaaq:
Sisimiuni illu ussissumik sanaaq seqerngullu qinngorneranik kiassarneqartoq atorneqarpoq, taannalu ineriartorteqqillugu ilinniartut inissiassaat 42-it sanaartorneqalerput, Sanaartornermut Ilinniarfimmi Pisortaq Jokum Møller ima nassuiaavoq:
- Uani pingaartinneqassaaq atortorissaarutissai tassa imaappoq nukissiutitigut atuinikitsuusariaqassaaq imaappoq kissaq pilersinneqartoq, aammalu atoqqittarnissaa uani anguniarneqarpoq taassumalu saniatigut aamma makkuninnga seqinermut kissamut pilersuutinik aamma peqarnissaa takorloorneqarpoq. Aamma annikinnerpaamik atuinissaa eqqarsaatigalugu, Jokum Møller oqarpoq nangillunilu:
- Ussissuussaaq kisianni silaannaa aamma uani eqqarsaatigineqartussaassaaq nalunngilarpummi suna tamarmi ussissuuvallaaraangami aamma peqqinnarpallaarneq ajortoq taamaattumik aamma uani atortorissaarutit aamma atorlugit nukippassuillu atunngikkaluarlugit silaannarittuunissaa uani anguniarneqartussaassaaq, Jokum Møller oqarpoq.
Taamaasilluni augustimi 2008-mi Ilinniartut inissaat naammassineqassapput. Ingerlanneqarneranut aningaasartuutit nalinginnaasumik affaannaanissaat naatsorsuutigineqarmat Namminersornerullutik Oqartussat ingerlatsinermut aningaasartuutikinnerunissartik nuannarutigissagaat qularnanngilaq.
Kollegiassap 42-nut inissallip sananeqarneratigut aqutsisuniit neriuutigineqarpoq Arktisk Ingeniøritut ilinniartussat amerlanerit nunatsinniit nunaniillu allaniit aallartittalerumaartut.
Kollegiassat sananeqarnissaannut igalaaliorfiup Villum Kann Rasmussenip aningaasaateqarfiata kiisalu A.P Møller nuliatalu Chastine McKinney Møllerip aningaasaateqarfia katillugu 40 millioninik aningaasaliipput, taakkua saniatigut Sisimiut Kommuneata nunagissaanissaq isumagissavaa, Danmarks Tekniske Universitetimiillu ilisimatusartut marluk tassani inissaqartinneqarnissaat aamma aningaasaliiffiginiarpaat, taamaasilluni kollegialiassat katillugit 50 million koruuninik naleqarnissaat naatsorsuutigineqarpoq.
Jokum Møller Sanaartornermut Ilinniarfimmi pisortaasoq aamma neriuppoq Lyngbymi DTU-p ungasinngisaani ilinniartunut kollegialiortoqarumaartoq. Ukiut kingulliit marluk tassani ingerlanneqartarmata.
