Kofoeds Skolemit oqariartuutigineqartoq ilisarinngilaat
Jan Thrysøep Aalborgimi Kalaallit Illuanni pisortaasup Kofoeds skolep kisitsisit saqqummiussai nalorninartoqartippai.
- Pisariaqanngilaq taama torinngitsigisumik ersersitsissalluni. Uagummi isumaqanngilagut pissutsit piviusut taamaattuusut, Jan Thrusøe oqarpoq.
Dr.dk-mi allaaserisaq naapertorlugu Kofoeds skolemi Aalborgimiittumi kalaallit atuisut 2009-mi 90-iupput. Ukiup tulliani marloriaataariarlutik ukioq manna piffissaq imaliinnartoq 139-it nalunaarsorneqarsimallutik. Kisiannili Kofoeds skolemiit kisitsisit eqqortuunersut Jan Thrusøemit qularutigineqarpoq.
- Naluara qanoq kisitseriaaseqarnersut. Iserlutik kaffisoriartuinnartut atuisutut nalunaarsorneqartarnersut ilisimanngilara. Kisiannimiuku kisitsisit qanoq atorneqarsimanersut nalunartartoq suminngaanneerfii ilisimaneqarneq ajormata. Kisitsisit taamaattut paasiuminaatsippakka aammalumi oqaatigisariaqarpara taakku tatiginagit, Jan Thrusøe oqarpoq.
Aalborgimi najugallit Kalaallit Nunaanni inunngorsimasut pillugit kisitsisit Danmarkimi naatsorsueqqissaartarfiup kisitsisaataanut sanilliullugit Kofoeds Skolep kisitsisaatai eqqortuunersut takutinneqanngimmat aamma taassuma tikkuarpaa.
2009-mi kisitsit 1.003-iupput, ukip tulliani 1.030-ullutik, ukioq mannalu januaarip aallaqqaataani 1.082-iullutik. Amerlariartoqalaarsimanera ilinniartoqarnerulersimaneranik timmisartumillu angalanerup akikinnerulersimaneranik nassuiaaserneqarsinnaasoq oqaatigaa.
Kofoeds Skolep aamma Kalaallit Illuutaata suliai assigiissuseqartorujussuupput. Sooruna pissutsinik piviusunik paasinnittarnersi taama assigiinngitsigisoq?
- Apeqqutitsialassuaq. Kalaallit illuutaat Naaminersorlutik Oqartussanit Aalborgillu Kommunianit aningaasalersugaavoq, taamaalilluni ajornartorsiornani. Kisianniliuku allat aningaasarsiutigalugu taamaaliortartut....qinnuteqaateqartuartariaqarput il.il. Tamanna pissutaasimanersoq oqaatigisinnaanngilara.
Kofoeds skole radioaviisimit ullumi attavigineqarpoq, aqagulu suliamut attuumassutilimmik oqaaseqaateqassalluni.
